मोबाइल टॉवर्सवर बडगा

कल्याण : महापालिका क्षेत्रातील कर थकबाकीप्रकरणी अखेरच्या टप्प्यात महापालिका प्रशासनाने मोबाइल टॉवर्सवर कारवाईचा बडगा उगारला. प्रशासनाने भारती एअरटेल, टाटा बीपीएल, इंडस, व्हीओ या मोबाइल कंपन्यांकडे ४.५ कोटींची थकबाकी असल्याने, ३९ मोबाइल टॉवरना जप्तीची नोटीस बजावली आहे.

२ दिवसांपासून करवसुलीसाठी महापालिकेच्या प्रभाग अधिकाऱ्यां मार्फत तीव्र मोहीम सुरू आहे. ग प्रभागक्षेत्र अधिकारी स्वाती गरुड यांनी डोंबिवली येथील विशाल चौधरी यांचे रुग्णालय ४० लाख २५ हजार थकबाकीकरिता जप्त करून सील केले. डोंबिवली स्टेशनजवळील नोबल रुग्णालयादेखील सील करण्यात आले. संबंधित रुग्णालयाने त्यानंतर थकबाकीपैकी १ कोटी ६२ लाखांचा धनादेश दिला आहे. राधाबाई मढवी यांचे कार्यालय २२ लाख ५४ हजार थकबाकीसाठी सील करण्यात आले. लोकधारा, कल्याण पूर्व मधील त्रिदल एज्युकेशन सोसायटीचे ग्लोबल इंग्लिश स्कूल ४४ लाख, पत्री पूल कचोरे येथील कुसूम रघुनाथ मुकादम यांचे डीएड कॉलेज १२ लाखांच्या वसुलीसाठी सील केलेे. भारती एअरटेल, टाटा बीपीएल, इंडस, व्हीओ या मोबाइल कंपन्यांकडे ४५० कोटींची थकबाकी असल्याने, ३९ मोबाइल टॉवर जप्त करण्याची नोटिस बजावली आहे.