म. टा. वृत्तसेवा, पालघर
पालघर तहसील कार्यलयातल्या सेतूमध्ये प्रतिज्ञापत्र करण्यासाठी नागरिक व विद्यार्थ्यांकडून पैसे उकळले जातात. अनेकदा त्यासाठी दबाव टाकला जातो. अशा पैसे देण्याची सक्त करणाऱ्यांवर कारवाई करण्याचे आदेश महसूल विभागाने गुरुवारी दिले.
सेतू कार्यालयातून मिळणाऱ्या विविध दाखल्यांच्या अर्जासोबत शपथपत्र (Affidavit) जोडण्याचा आग्रह करून त्याद्वारे नागरिकांची लाखो रुपयांची लूट करणाऱ्या काही दलालांची मक्तेदारी मोडून काढण्याच्या दृष्टीने पालघरचे तहसीलदार महेश सागर यांनी दाखल्यासाठी शपथपत्राची सक्ती करणाऱ्यांविरोधात तहसील कार्यालयात तक्रार करण्याचे आवाहन केले आहे.
१०वी, १२वीचा निकाल जाहीर झाल्यानंतर शैक्षणिक प्रवेश, विविध परीक्षा आदींसाठी विविध दाखले मिळविण्यासाठी विद्यार्थी व त्यांच्या पालकांची धावपळ सुरू असून तालुक्यातील सर्व सेतू कार्यालयांसमोर मोठमोठ्या रांगा लागल्या आहेत. दाखल्यासाठी लागणाऱ्या आवश्यक कागदपत्रांची पूर्तता करण्याच्या दृष्टीने तालुका तहसील कार्यालयात आलेल्या ग्रामीण भागातील पालकांना दाखल्यासोबत १०० रुपयांचे स्टॅम्पपेपर घेण्याचा आग्रह करून त्यावर मजकूर लिहिण्यासाठी वेगळी रक्कम आकारली जाते. तहसील कार्यालयपरिसरात फरिणाऱ्या दलालांच्या तक्रारीही करण्यात आल्या होत्या.
उपजिल्हाधिकारी विकास गजरे आणि तहसीलदार महेश सागर यांनी स्वतःची ओळख लपवून सेतू कार्यालयासमोर उभ्या असलेल्या पालकांच्या चर्चेचा अंदाज घेतला असता ही गंभीर बाब त्यांच्या निदर्शनास आली. राज्य आणि केंद्र शासनाने सर्व शासकीय कार्यालये, स्थानिक स्वराज्य संस्था आदी. शासकीय संस्थांमध्ये शपथपत्राऐवजी स्वंय घोषणापत्रे व प्रमाणपत्रे, कागदपत्रांच्या साक्षांकित प्रतींऐवजी स्वंय साक्षांकित प्रती स्वीकृत करण्याचे आदेश दिले असूनही ग्रामीण भागातील गरीब, अशिक्षित लोकांच्या अज्ञानाचा फायदा घेऊन काही स्टॅम्प वेंडर अर्जासोबत स्टॅम्प पेपर घेण्यासाठी आग्रह करत होते. ही लूट थांबवण्यासाठी यासंबंधीचे माहितीफलक आता सर्वत्र लावण्यात आले आहेत.
दलालांपासून सावध राहण्याचे आवाहन तहसीलदार सागर यांनी केले असून शपथपत्र जोडण्याबाबत सक्ती केली जात असल्यास तहसील कार्यालयात ०२५२५-२५४९३० या क्रमांकावर संपर्क साधण्याचे आवाहन त्यांनी केले आहे.