परवाना प्रक्रियेला हमीपत्राची जोड

दलालांना चाप बसवण्यासाठी आरटीओचे पाऊल

म. टा. प्रतिनिधी, ठाणे

रिक्षा परवाना पद्धतीला लागलेल्या दलालांच्या विळख्याला चाप बसवण्यासाठी योग्य कागदपत्रांना अर्जदाराकडून हमीपत्र जोडण्याची सक्ती ठाणे प्रादेशिक परिवहन विभागाने अर्जदारांना केली आहे. अवघ्या तीनच दिवसांपूर्वी ‘महाराष्ट्र टाइम्स’ने ‘रिक्षापरवान्यांत दलाली' या वृत्तामधून आरटीओमध्ये सुरू असलेल्या दलालांच्या भोंगळ कारभाराला वाचा फोडली होती. त्यामुळे दलालांच्या कारवायांना काही प्रमाणात तरी अटकाव लागण्याची शक्यता आहे.

‘मागेल त्याला रिक्षा - टॅक्सी परवाना’ या परिवहन विभागाच्या या घोषणेनंतर रिक्षा परवान्याचा अर्ज दाखल करण्यासाठी ठाणे प्रादेशिक परिवहन कार्यालयाबाहेर अर्जदारांनी गर्दी केली. मात्र आरटीओमधील प्रत्येक कारभाराप्रमाणे या पद्धतीलाही दलालांचा विळखा पडल्याचा प्रकार समोर आला होता. १६ हजार रुपयांच्या ‘डीडी’सह योग्य कागदपत्रे सादर केल्यास अर्जदाराचा अर्ज स्वीकारण्याचा नियम असतानाही सर्वसामान्य अर्जदारांना माघारी पाठवले जात होते. त्यांच्याकडे पोलिसांचे ‘ना हरकत प्रमाणपत्र’, बॅज, लायसन्स आदी असूनही हे प्रकार सुरू होते. तर दलालांच्या अर्जांना स्वीकृती मिळत असल्याने सर्वसामान्य अर्जदार हवालदिल झाले होते. त्यामुळे परवाना न मिळाल्यास शिफ्ट पद्धतीत रिक्षा चालवण्याची वेळ सर्वसामान्य रिक्षाचालकांवर कायम राहणार होती. याबाबत ‘मटा’मधून वृत्त प्रसिद्ध होताच ठाणे आरटीओ शुक्रवारपासून येणाऱ्या अर्जदारांकडून हमीपत्र लिहून घेत आहे. यामध्ये मी कोणत्याही दलालाकडे जाणार नाही, अधिकचे पैसे देऊन दलालामार्फत कोणतेही काम करणार नाही, तसेच आरटीओमधील कामासाठी अतिरिक्त पैसे देणार नाही, असे एका हमीपत्रावर लिहून घेण्यास सुरुवात करण्यात आली आहे. अर्जदाराच्या अन्य कागदपत्रांसह हमीपत्र जोडणे सक्तीचे करण्यात आले असून ठाणे आरटीओने प्रथमच हा नवा पॅटर्न समोर आणल्याचे प्रादेशिक परिवहन अधिकारी नंदकिशोर नाईक यांनी ‘मटा’शी बोलताना स्पष्ट केले.

दरम्यान, अद्यापही ‘वाहन ४’ या ऑनलाइन प्रणालीवर परवाना पद्धतीचे काम सुरू झालेले नसून ‘एनआयसी’ यंत्रणेकडून याबाबत कार्यवाही सुरू असल्याचे नाईक यांनी सांगितले.