पुन्हा ‘बिकानेर’

अस्वच्छतेमुळे बेलापूरमधील दुकान एफडीएच्या रडारवर

म. टा. वृत्तसेवा, ठाणे

नवी मुंबईमधील डी. वाय. पाटील कॉलेजसमोर असणाऱ्या बिकानेर स्वीट्सच्या दुकानावर दोन आठवड्यांपूर्वीच झालेल्या कारवाईनंतर कोकण विभागाच्या अन्न व औषध प्रशासनाने सीबीडी बेलापूरच्या एमआयडीसी शिरवणे भागातील बिकानेर स्वीट्स अँड नमकीन्सवरही कारवाई केली. यामध्ये दुकानातील स्वयंपाकघरातील प्रचंड अस्वच्छतेमुळे तेथे पदार्थांच्या विक्रीलाही अन्न व औषध प्रशासनाकडून बंदी घालण्यात आली. नवी मुंबईच्या दोन बिकानेर आणि मेहक या मिठाईच्या दुकानांवरील कारवाईनंतर अन्न व औषध प्रशासनाने सर्वच दुकानांची जोरदार तपासणी करण्यास सुरुवात केली आहे.

पावसाळ्यात दूषित पाण्यामुळे अन्नपदार्थातून होणाऱ्या विषबाधेसारख्या घटना टाळण्यासाठी तसेच नागरिकांना स्वच्छ, सुरक्षित खादयपदार्थ खाता यावेत, यासाठी कोकण विभागाच्या अन्न व औषध प्रशासनाचे सह आयुक्त (अन्न) सुरेश देशमुख यांच्या मार्गदर्शनाखाली हॉटेल आणि रेस्टॉरंट्सची अन्नसुरक्षा अधिकाऱ्यांनी सखोल तपासणीचे सत्र सुरूच ठेवले आहे. ठाण्यातील हॉटेलवरील कारवाईनंतर अधिकाऱ्यांनी नवी मुंबईतील मिष्टान्न आणि इतर पदार्थांमध्ये प्रसिद्ध असणाऱ्या दुकानांवर धाडसत्र अवलंबले आहे. त्यामध्ये नेरूळमधील सेक्टर १५ मध्ये असणाऱ्या महेक स्वीट्स आणि त्याआधीच्या बिकानेरवरील कारवाईनंतर सीबीडी बेलापूरच्या शिरवणे येथील बिकानेर स्वीट्स अँड नमकीन्सची एफडीएने तपासणी केली असता दुकानाच्या स्वयंपाकघरामधील मिठाई बनविण्यात येणाऱ्या भांड्यांच्या वरील भागात असणाऱ्या दोरीवर तेथील कामगारांचे कपडे वाळत घालण्यात आल्याचे आढळून आले. तसेच दर्शनी भागात असणाऱ्या मिठाईसह खाद्यपदार्थांवरही माश्या आणि चिलट घोंगावत होती. स्वयंपाकघरात उंदरांचा सुळसुळाट झाला होता. तसेच सर्वच कच्चा माल उघड्यावर ठेवण्यात आल्याने असल्याने एफडीएने तात्काळ दुकानाच्या व्यवस्थापनास खाद्यपदार्थांची विक्री बंद करण्याचे निर्देश दिल्याचे देशमुख यांनी सांगितले.

ठाणे, नवी मुंबई आदी शहरांमधील प्रसिद्ध मिठाईची दुकाने आणि हॉटेलांवरील कारवाईनंतर भविष्यात एफडीए वसई, कल्याण-डोंबिवली, मीरारोड आदी भागांमध्ये कारवाई तीव्र करणार आहे. तसेच दोषींवर कठोर कारवाई केली जाणार आहे.

- सुरेश देशमुख, सह आयुक्त, अन्न व औषध प्रशासन (अन्न)