म. टा. वृत्तसेवा, ठाणे
आशा स्वयंसेविकांना कामावर आधारित मोबदला दिला जातो. सध्या अडीच हजार रुपये सरासरी दरमहा मानधन दिले जात असून ते अत्यल्प आहे. गटप्रवर्तक व आशा स्वयंसेविकांना शासकीय सेवेत कायम करेपर्यंत अंगणवाडी सेविकांएवढे मानधन मिळाले पाहिजे, या मागणीसाठी महाराष्ट्र राज्य आशा-गटप्रवर्तक कर्मचारी कृती समितीच्या वतीने ७ ऑगस्ट रोजी, जिल्हा परिषद व मंत्रालयावर जेलभरो आंदोलन करण्यात येणार आहे.
जानेवारी व फेब्रुवारीमध्ये वित्त मंत्री आणि ठाण्याचे पालकमंत्री एकनाथ शिंदे यांच्याशी चर्चा झाली. त्यावेळी त्यांनी आशा स्वयंसेविकांचे व गटप्रवर्तकांचे मानधन अडीच ते तिप्पट वाढविण्याचे आश्वासन दिले होते. मात्र याबाबत अद्यापही सरकारने आदेश लागू केला नाही. त्यामुळे राज्यातील ६४ हजार आशा स्वयंसेविका संतप्त भावना व्यक्त करत आहेत. राज्यात आशा स्वयंसेविकांना दहमहा दहा हजार रुपये मानधन मिळते. अंगणवाडी सेविकांएवढे मानधन मिळावे, यासाठी ७ ऑगस्ट रोजी, जिल्हा परिषद व मंत्रालयावर जेलभरो आंदोलन करण्यात येणार असल्याचे कृती समितीचे निमंत्रक एम. ए. पाटील यांनी सांगितले.