ठाण्यातील करोनाची साखळी तोडण्यासाठी मुख्यसचिव मैदानात; दिल्या 'या' सूचना

ठाणे: मुंबईपाठोपाठ ठाणे जिल्ह्यातही करोनाचे रुग्ण वाढत असून ठाणे जिल्ह्यातील करोनाची साखळी तोडण्यासाठी आता स्वत: राज्याचे मुख्य सचिव अजोय मेहता मैदानात उतरले आहेत. आज त्यांनी ठाण्यासह कल्याण-डोंबिवली, भाईंदर, उल्हासनगर आणि भिवंडी येथील करोना परिस्थितीचा आढावा घेतला. तसेच करोना रोखण्यासाठी पालिका अधिकाऱ्यांना काही महत्त्वाच्या सूचनाही दिल्या आहेत.

मुख्य सचिव अजोय मेहता यांनी ठाण्याचे महापालिका आयुक्त आणि सहाय्यक आयुक्तांशी संवाद साधून त्यांना महत्त्वाच्या सूचना दिल्या. प्रत्येक करोना बाधित व्यक्तींच्या संपर्कातील किमान २० लोकांचे कॉन्टॅक्ट ट्रेसिंग करण्याची आवश्यकता आहे. तरच करोनाची साखळी तोडता येईल, असे मेहता यांनी सांगितले. झोपडपट्टीतील कोणत्याही रुग्णाला घरच्या घरी क्वॉरंटाइन करू नका. त्यांना क्वॉरंटाइन सेंटरमध्येच पाठवा, असं सांगतानाच कंटेन्मेंट झोनची व्याप्ती वाढवून त्याची काटेकोर अंमलबजावणी करण्याच्या सूचनाही त्यांनी दिल्या.

'बिगिन अगेन' म्हणतात आणि लॉकडाऊनचे इशारे देतात, सगळाच गोंधळ चाललाय!

रुग्णालय व्यवस्थापन महत्वाची बाब असून जास्तीत जास्त लोकांना कोविड केअर सेंटरमध्ये पाठवा, जेणेकरून गरजू लोकांना ॲाक्सिजनचे बेड्स उपलब्ध होतील, असंही त्यांनी सांगितलं. कॉन्टॅक्ट ट्रेसिंगवर भर देऊन रुग्णांना रुग्णालयात पाठवा, अशा सूचनाही त्यांनी दिल्या. आढावा बैठकीनंतर मुख्य सचिवांनी ग्लोबल इम्पॅक्ट हब येथे एमएमआरडीए आणि एमसीएचआयच्या सहकार्याने उभारण्यात येत असलेल्या एक हजार बेड्सच्या हॅास्पिटलची पाहणी करून त्याची प्रशंसा केली. यावेळी नगर विकास विभाग(२) चे प्रधान सचिव महेश पाठक, आरोग्य विभागाचे प्रधान सचिव डॅा. प्रदीप व्यास, विभागीय आयुक्त लोकेश चंद्र, नवी मुंबई पोलिस आयुक्त संजय कुमार, महापालिका आयुक्त विजय सिंघल आणि जिल्हाधिकारी राजेश नार्वेकर आदी उपस्थित होते.

एसआरएबाबत आव्हाडांचा मोठा निर्णय; करोनातून दिलासा मिळणार?