‘ठाण्याचा गणेशोत्सव’ एका क्लिकवर

vinit.jangle@timesgroup.com

Tweet : @vinitjangleMT

ठाणे : अरे, तुमच्या मंडळाचा आगमन सोहळा कधी रे... पाद्यपूजनाचे फोटो छानच आलेत... यंदा कोणते ढोलपथक येणार आहे, तुमच्या बाप्पाच्या विसर्जनाला, अशा एक ना अनेक चर्चा कोणत्याही नाक्यावर अथवा मंडळाच्या मंडपातील नसून ठाण्यातील चार तरुणांनी तयार केलेल्या ‘ठाण्याचा गणेशोत्सव’ या फेसबुक पेजवर रंगताना दिसत आहेत. विशेष म्हणजे, मुंबईतील गणेशोत्सव मंडळांच्या फेसबुक पेजच्या धर्तीवर या संकल्पनेला ‘मूर्ति’मंत आकार देण्यात आला असला तरीही ठाण्यातील मंडळांना एकाच व्यासपीठावर एकत्रित येण्याची संधी या पेजच्या माध्यमातून मिळाल्याचे दिसून येते. त्यामुळे मुंबईच्या बाप्पांच्या आगमन सोहळ्यांसह विविध कार्यक्रमांचे ‘ऑनलाइन’ अपडेट मिळवण्यासाठी या पेजवरील ‘क्लिक’ हक्काचे ठरणार आहे.

मुंबईतील गणेशोत्सवाची ख्याती देशासह परदेशातही आहे. या शहराला खेटून असलेल्या ठाण्यातही जुन्या जाणत्या मंडळांची संख्या अधिक असून मुंबईप्रमाणेच गेल्या काही वर्षांपासून ठाण्यातील गणेशोत्सव मंडळात मोठमोठ्या उंचीच्या मूर्तींची प्राणप्रतिष्ठापना करण्यात येते. त्यांचे पाद्यपूजन असो वा आगमन सोहळे त्यांचेही जोरदार ब्रॅण्डिंग प्रत्येक मंडळांच्या कार्यकर्त्यांकडून वैयक्तिक पद्धतीत केली जाते. मात्र या सर्व मंडळांना एकाच व्यासपीठावर आणण्यासाठी ठाण्यातील ऋषी पाटील, अपूर्व तिवारी, मोनीस तांबे आणि सुशांत जाधव या चौघा तरुणांनी ‘ठाण्याचा गणेशोत्सव’ या पेजची चार वर्षांपूर्वी स्थापना केली. मात्र काही वर्षे अपडेटपासून कोसो दूर असलेल्या या पेजला यंदा मंडळांना भेडसावणाऱ्या विविध समस्यांपायी उभारी मिळाली. यामध्ये विसर्जनादरम्यान रेतीबंदर परिसरात होणारी मूर्तींची गर्दी, अत्याधुनिक पद्धतीच्या तारफ्याची विसर्जनाला लागणारी गरज, मंडळांचे विविध प्रश्न आदींवर तोडगा काढण्यासाठी या पेजचा सकारात्मक उपयोग होत असल्याची माहिती या पेजचे अॅडमिन सुशांत जाधव यांनी ‘मटा’शी बोलताना दिली.

मेकिंग टू लाइव्ह

शहरातील जुने गणपती कारखाने, मंडळांमधील देखणी सजावट आदींमधील मूर्तींसह सजावटीचे मेकिंगही फेसबुक लाइव्हच्या माध्यमातून या फेसबुक पेजवर अपलोड करण्यात येते. त्यातून गणेशभक्तांना शहरातील मंडळांशी घरबसल्या कनेक्ट होण्याची संधी मिळते.