साडेतीन लाखांची लूट

ठाणे : स्वयंपाकाची कामे करणाऱ्या एका मोलकरणीच्या घरात साडेतीन लाख रुपयांच्या दागिन्यांची चोरी झाल्याची घटना अंबरनाथ पोलिस स्टेशनच्या हद्दीत घडली आहे. बनावट चावीने घराचे दार उघडून आत शिरलेल्या चोराने तिजोरीसुद्धा बनावट चावीनेच उघडली आहे. या प्रकरणी चोरीचा गुन्हा दाखल करण्यात आला.

अंबरनाथ येथील विठ्ठल मंदिराजवळच्या गौतम चाळीत ही मोलकरीण राहते. शनिवारी रात्री सव्वाआठ वाजण्याच्या सुमारास ती घरी परतली, तेव्हा कपाटाची तिजोरी उघडी असल्याचे तिला आढळले. चोरांनी तिजोरीतील ७० हजारांचे मंगळसूत्र, ५५ हजार रुपये किमतीचे दोन नेकलेस, ४० हजार रुपयांच्या चार अंगठ्या, ब्रेसलेट, सोन साखळी, कर्णफुले आणि ७० हजार रुपये रोख असा साडेतीन लाख रुपयांचा ऐवज चोरला आहे.