रिक्षात न्यायला नकार; गावगुंडांनी थेट तरुणाच्या डोक्यात चॉपरने केले वार; घटना CCTVमध्ये कैद

अंबरनाथ : अंबरनाथमध्ये दोन गावगुंडांनी किरकोळ कारणातून एका तरुणावर चॉपरने हल्ला केल्याची घटना घडली आहे. या हल्ल्यात सदर तरुण गंभीर जखमी झाला असून सध्या त्याच्यावर रुग्णालयात उपचार सुरू आहेत. गायकवाड पाडा भागात घडलेला हा सर्व प्रकार सीसीटीव्हीत कैद झाला आहे.

पोलिसांकडून मिळालेल्या माहितीनुसार, अंबरनाथच्या गायकवाड पाडा भागात कल्पेश पाटील हा तरुण वास्तव्याला आहे. याच परिसरात राहुल गायकवाड आणि चिकू बाविस्कर हे दोन गावगुंड राहतात. सोमवारी रात्री साडेबाराच्या सुमारास कल्पेश हा त्याच्या मित्रांसोबत रात्री जेवण करून परिसरात फिरत असताना राहुल गायकवाड आणि चिकू बाविस्कर हे दोघे दुचाकीवरून तिथे आले.

अकोला पोलीस दलात खळबळ! रेल्वे, तसेच भाजप खासदाराचे घर बॉम्बने उडवण्याची धमकी

यापैकी चिकू बाविस्कर याने कल्पेशच्या डोक्यात बियरची बाटली फोडली. तर राहुल गायकवाड याने त्याच्याजवळील चॉपरने दोन वार केले. यापैकी एक वार कल्पेशच्या डोक्यात बसला, तर दुसरा वार त्याने हातावर झेलला. यानंतर राहुल आणि चिकू या गावगुंडांनी कल्पेशच्या घरी जाऊन त्याच्या दुचाकी आणि रिक्षाचीही तोडफोड केली. कल्पेश याने २ महिन्यांपूर्वी राहुल याला रिक्षेने बदलापूरला न्यायला नकार दिला असल्याच्या रागातून हा हल्ला करण्यात आल्याची माहिती पोलिसांनी दिली.

दरम्यान, या प्रकरणी अंबरनाथच्या शिवाजीनगर पोलीस ठाण्यात गुन्हा दाखल करण्यात आला असून पोलीस सध्या राहुल आणि चिकू यांचा शोध घेत आहेत. अंबरनाथच्या पालेगाव भागात दोन ते तीन दिवसांपूर्वी काही गावगुंडांनी उधारी मागितली म्हणून हॉटेलच्या मॅनेजरला मारहाण केली होती. त्या प्रकरणातही राहुल गायकवाड याचा सहभाग असल्याची माहिती समोर आली आहे. त्यामुळे अशा गुंडांना पोलिसांनी जरब बसवावी, अशी मागणी स्थानिक नागरिकांकडून केली जात आहे.