स्कायवॉक, शौचालये डोईजड

देखभाल, दुरुस्तीचा खर्च करताना पालिकेची दमछाक

म. टा. वृत्तसेवा, अंबरनाथ

एमएमआरडीएकडून कोट्यवधी रुपये खर्च करत उभारण्यात आलेले स्कायवॉक आणि शौचालये नगरपालिकेकडे हस्तांतरित करण्यात आली आहेत. परंतु आता नगरपालिकेची या स्कायवॉक आणि शौचालयांच्या देखभाल, दुरुस्तीचा खर्च करताना दमछाक होत आहे. यामुळे हे प्रकल्प प्रशासनासाठी पांढरे हत्ती ठरत आहेत.

एमएमआरडीएने अंबरनाथ, बदलापूर या शहरांच्या वाढत्या नागरिकरणाचा विचार करत भविष्यात या भागातील वर्दळीतून नागरिकांना सुरक्षित प्रवास करण्यासाठी स्कायवॉकची संकल्पना मांडली आणि त्याच संकल्पनेतून अंबरनाथ शहरातील पश्चिम भागात जवळपास दहा कोटींच्या निधीतून रेल्वे स्टेशन ते नगरपालिका असा स्कायवॉक उभा केला आहे. शहर हागणदारीमुक्त करण्यासाठी मोठ्या प्रमाणात एमएमआरडीएने काही ठिकाणी दुमजली शौचालये उभारली आहेत. यात अंबरनाथ नगरपालिका हद्दीत ७२ शौचालयांसाठी अंदाजे १८ कोटी रुपयांचा निधी खर्च केला होता. सुरुवातीला ही शौचालये सामाजिक संस्थांना चालवण्यास देण्यात आली होती. मात्र एमएमआरडीने राबवलेल्या या उपक्रमांतर्गत अनेक शौचालयांची दुरवस्था झाली. त्यातील अनेक शौचालयांचा वापर गर्दुल्ले करत. सामान ठेवण्यासाठी किंवा दारूचे अड्डे म्हणूनही या शौचालयांचा वापर झाल्याचे उघड झाले. अखेर स्कायवॉक आणि शहरातील ७२ सार्वजनिक शौचालये नगरपालिकेकडे सोपवण्यात आली. मात्र त्यांचा खर्च भागवताना पालिकेची दमछाक होताना दिसत आहे. यामुळे स्कायवॉक आणि शौचालयांची दुरवस्था कायम आहे.

स्कायवॉक हस्तांतरणावेळी विद्युत बिलाच्या रकमेच्या गोंधळामुळे अनेक महिने स्कायवॉक अंधारात होता. तसेच सध्या तुटलेल्या लाद्या, बंद विद्युत दिवे, सुरक्षारक्षक, स्वच्छतेचा अभाव अशा अनेक कारणांमुळे स्कायवॉकचा वापर करण्यास सर्वसामान्य पाठ फिरवतात. प्रेमीयुगुल आणि गर्दुल्ल्यांचाच वावर असतो. शहरातील ७२ सार्वजनिक शौचालयांचीही हीच परिस्थिती आहे. या शौचालयांच्या दुरुस्तीसाठी नगरपालिकेला पुन्हा लाखो रुपयांचा निधी खर्च करण्याची वेळ आली आहे. यातील अनेक शौचालये दुरवस्थेत उभी असून त्यांचा वापर आजही इतर कामांसाठीच अधिक होत असल्याचे पाहायला मिळत आहे.