जादूटोणा प्रतिबंध कायद्यानुसार पती, सासरासह तिघांवर गुन्हा
म. टा. प्रतिनिधी, ठाणे
भिवंडीत विवाहित महिलेसोबत अघोरी कृत्य करण्यात आल्याचा धक्कादायक प्रकार समोर आला असून हा प्रकार करणारा महिलेचा पती, सासरा आणि अन्य एक नातेवाईकच आहे. एक वर्षानंतर या प्रकारची महिलेने तक्रार केल्यानंतर तिघांविरुद्ध जादूटोणा प्रतिबंध कायद्यानुसार शांतीनगर पोलिस ठाण्यात गुन्हा दाखल करण्यात आला आहे.
मागील वर्षी जून महिन्यात काही कामानिमित्त पीडित २७ वर्षांची महिला माहेरी गेली होती. त्यावेळी पतीने फोन करून तिला ताबडतोब घरी बोलावून घेतले. दुसऱ्या दिवशी पती तिला नणंदेच्या घरी घेऊन गेला. त्याठिकाणी पतीसह सासरा आणि नणंदचा पती असे तिघे उपस्थित होते. रात्री १२. ३० ते २. ३० या वेळेत महिलेला बेडरूममध्ये बसवून सासऱ्याने महिलेच्या शरीरावर अत्तर लावले. तसेच अगरबत्तीचा वासही तिला दिला जात होता. अंगात भूत असल्याचे सांगून महिलेच्या डोक्याचे केसही कापण्यात आले होते. या महिलेसोबत चार दिवस अघोरी कृत्य चालू होते. महिलेने हा प्रकार पतीला सांगितल्यानंतर त्यानेही दुर्लक्ष केले. नंतर महिला मुलाला घेऊन पतीपासून वेगळी राहू लागली. तरीही पती महिलेशी किरकोळ कारणावरून भांडण करत तिला मारहाण करत होता. मागील काही महिन्यांपासून ही महिला माहेरी राहत असून तिच्यासोबत घडलेल्या अघोरी प्रकाराबाबत तिने पोलिस ठाण्यात धाव घेत पती, सासऱ्यासह तिघांविरुद्ध तक्रार दाखल केली.