मोबाइलवरून भांडण; पत्नीचा पतीला चावा

कल्याण : पतीनं मोबाइल हिसकावण्याचा प्रयत्न केला असता, तो परत मिळवण्यासाठी पत्नीनं त्याच्या हाताला चावा घेतल्याचा प्रकार कल्याणमध्ये घडला आहे. या प्रकरणी पत्नीविरोधात पोलिसांत तक्रार केली आहे. पोलिसांनी या महिलेवर गुन्हा दाखल केला आहे.

कल्याण पश्चिमेकडील खंडागळे सदन येथे दिलीप रेहनकर कुटुंबासह राहतात. शनिवारी सकाळी दिलीप यांच्या पत्नी नूतन या मोबाइल घेऊन बाथरूममध्ये गेल्या होत्या. बाथरूममधून बाहेर आल्यानंतर दिलीप यांनी नूतन यांच्याकडे मोबाइल मागितला, मात्र नूतनने मोबाइल देण्यास नकार दिल्याने दिलीप यांनी तिच्या हातातून मोबाइल घेतला, मात्र नूतनने मोबाइल हिसकावून घराबाहेर जाऊन त्यांना शिवीगाळ केली. यावेळी दिलीप यांनी नूतन यांच्या हातातून मोबाइल हिसकावून घेण्याचा प्रयत्न केला असता नूतन यांनी दिलीप यांच्या हाताला चावा घेतला. या प्रकरणी दिलीप यांनी महात्मा फुले पोलिस ठाण्यात तक्रार दाखल केली असून पोलिसांनी पत्नी नूतनविरोधात गुन्हा दाखल करत पुढील तपास सुरू केला आहे.