केडीएमटीच्या धडकेत अधिकाऱ्याचा मृत्यू
म. टा. वृत्तसेवा, ठाणे
रस्त्याच्या मध्यभागी असलेला दगड चुकविण्याच्या नादात कल्याण डोंबिवली महापलिका परिवहन बसचा बुलेटला धक्का लागून राज्य उत्पादन शुल्क विभागाच्या दुय्यम निरीक्षकाचा मृत्यू झाल्याची घटना शिळ-डायघर परिसरात घडली. या अपघतात उत्पादन शुल्कचा आणखी एक कर्मचारी जखमी झाला असून बसचालकाविरुद्ध शिळ-डायघर पोलिस ठाण्यात गुन्हा दाखल करण्यात आला आहे.
उत्पादन शुल्कच्या नवी मुंबई कार्यालयातील दुय्यम निरीक्षक राजेंद्र निकुंभ (रा. कल्याण पूर्व) आणि जवान विनोद जाधव (४६ रा. संघवी रिजन्सी, कल्याण) मंगळवारी सकाळी बुलेटवरून कार्यालयात निघाले होते. यावेळी बुलेटच्या पाठीमागे निकुंभ बसले होते. कल्याण-शिळ रस्त्यावरून जात असताना येथील भोलेनाथ हॉटेलसमोर बुलेटच्या उजव्या बाजूला समांतर केडीएमटी बस जात होती. मात्र रस्त्यावर मध्यभागी असलेला दगड वाचविण्यासाठी चालकाने बस वेगात डाव्या बाजूला घेतल्याने बसचा धक्का बुलेटला लागला. त्यामुळे बुलेट चालवताना जाधव यांचा तोल गेला आणि दोघेही रस्त्यावर बुलेटसह पडले. या अपघातात निकुंभ बसच्या डावीकडील मागील चाकाखाली आल्याने ते गंभीर जखमी झाले होते. घटनास्थळी आलेल्या पोलिसांनी तातडीने निकुंभ यांना कळव्यातील छत्रपती शिवाजी महाराज रुग्णालयात दाखल केले. परंतु त्यांचा मृत्यू झाला होता. या अपघातात जाधवही जखमी झाले आहेत.