बदलापूर : बदलापूर शहरातील हेंद्रपाडा परिसरात राहणाऱ्या ३६ वर्षीय व्यक्तीला करोनाची लागण झाल्याचे राविवारी समोर आले. नवी मुंबई येथील फार्मा कंननीतील करोनाबाधित सहकाऱ्याच्या संपर्कात आल्याने या व्यक्तीला करोनाची लागण झाली. या बाधित व्यक्तीवर रुग्णालयात उपचार सुरू आहे. मात्र त्याची पत्नी आणि पाच वर्षीय मुलीचा करोना चाचणी अहवाल निगेटिव्ह आला आहे. शहरातील एकूण बाधित रुग्णांची संख्या १७वर पोहोचली आहे.
बदलापुरात करोनाबधितांची संख्या दिवसेंदिवस वाढत आहे. शहरात आधीच १६ करोनाबाधित रुग्ण असताना, नवी मुंबई, दिगी गाव येथील फार्मा कंपनीत काम करणाऱ्या आणि हेंद्रपाडा परिसरात राहणाऱ्या व्यक्तीला लागण झाल्याचे रविवारी समोर आले. बाधित व्यक्ती काम करत असलेल्या कंपनीतील एका कामगाराला करोनाची लागण झाली होती. बदलापुरातील व्यक्ती त्याच्या संपर्कात आल्याने त्याला १५ एप्रिलपासून विलगीकरण कक्षात ठेवण्यात आले होते. रविवारी त्याचा अहवाल पॉझिटिव्ह आला. सध्या त्याच्यावर ठाणे येथील एका रुग्णालयात उपचार सुरू आहेत. बाधित व्यक्ती ज्या वाहनातून बदलापूरहून नवी मुंबईपर्यंत प्रवास करत होती, त्या वाहनातील त्याच्या इतर तीन सहकाऱ्यांची चाचणी केली असता, त्यांचे अहवाल निगेटिव्ह आले. त्यामुळे बदलापूर शहरात पुन्हा अत्यावश्यक सेवेसाठी प्रवास करणाऱ्या कर्मचाऱ्याला लागण झाल्याचे आणखी एक प्रकरण समोर आले.