सुरक्षाच 'चेकमेट'!

कोट्यवधींच्या रकमेची सुरक्षा एका बंदुकीच्या बळावर

विनित जांगळे, ठाणे

दररोज होणारे कोट्यवधींचे व्यवहार, लाखोंच्या रकमांची आदानप्रदान आणि इतक्या संवेदनशील ठिकाणाच्या सुरक्षिततेसाठी केवळ एक बंदूकधारी सुरक्षारक्षक; आदी बाबींमुळे ठाण्याच्या चेकमेट सर्व्हिस प्रा. लि. कंपनीच्या कॅश कलेक्शन सेंटरमध्ये झालेल्या कोट्यवधींच्या जबरी चोरीनंतर तेथील सुरक्षाच फोल असल्याचे सिद्ध होते. आश्चर्याची बाब म्हणजे, कंपनीच्या बंदूकधारी सुरक्षारक्षकडील गोळ्याही चोरट्याने पळविल्या तसेच सुरक्षिततेसाठी बसविण्यात आलेले सीसीटीव्ही, त्याची रेकॉर्डिंग करणारे डीव्हीआरही चोरट्याने लंपास केल्याने चेकमेट कंपनीची सुरक्षितता चोरट्यांनी 'चेकमेट' केल्याचे स्पष्ट होते.

शहरातील मॉल्समधील शेकडो दुकाने, नामांकित ब्रॅण्ड्सची शोरूम्स आदींकडे दिवसाकाठी लाखोंची रक्कम गोळा होते. त्यामुळे या व्यापाऱ्यांकडे जमा होणारी रक्कम आयसीआयसी, अँक्सेस, येस आदी नामांकित बँकेत नित्याने जमा करण्यासाठी बँक आणि व्यापाऱ्यांमध्ये 'मध्यस्थ' म्हणून चेकमेट सर्व्हिस प्रा. लि. कंपनी काम पाहत होती. दोन वर्षांपासून मेंटल हॉस्पिटलनजीकच्या हरदीप सोसायटीच्या बेसमेंटमध्ये असणाऱ्या चेकमेट कंपनीत तीन शिफ्ट्समध्ये ८५ कर्मचारी काम करतात. घटनेच्या दिवशीही मंगळवारी पहाटे १७ कर्मचाऱ्यांसह दोन सुरक्षारक्षक कंपनीत होते. मात्र त्यापैकी केवळ सुरक्षारक्षक प्रकाश पवार यांच्याकडेच १२ बोअरची बंदूक होती. त्याच्याही गोळ्या चोरट्यांनी पळवून नेल्याने सुरक्षेचा कारभार रामभरोसे असल्याची बाब यानिमित्ताने समोर आली. चेकमेटच्या सुरक्षिततेत दाखविलेला हलगर्जीपणाच चोरट्यांच्या पथ्यावर पडला.

दरम्यान, चेकमेट कंपनीत अशाप्रकारे कोट्यवधींचे व्यवहार होत असल्याची स्थानिक पोलिसांनाही कल्पना नसल्याचे खुद्द पोलिस आयुक्त परमबीर सिंग यांनी सांगितले.