ठाण्यात सशस्त्र दरोडा; २५ कोटी लुटले!

मटा ऑनलाइन वृत्त । ठाणे

ठाण्यातील तीनहात नाका परिसरातील मनोरुग्णालयाजवळील कॅश कलेक्शन सेंटरवर आज पहाटेच्या सुमारास सात ते आठ जणांनी सशस्त्र दरोडा घातला. दरोडेखोरांनी सुमारे २५ कोटी रुपये लुटल्याची माहिती समोर आली आहे. घटनेनंतर पोलिसांनी ठाण्यासहीत मुंबईतही नाकाबंदी केली आहे.

मनोरुग्णालयाजवळील हरदीप सोसायटीमध्ये ठाण्यातील अनेक एटीएम आणि मोठमोठ्या शोरुमचे कॅश कलेक्शन करणारी चेकमेट प्रायव्हेट लिमिटेड ही कंपनी आहे. या कंपनीवर सात ते आठ जणांनी पहाटेच्या सुमारास दरोडा घातला. त्यांनी २५ कोटींची रोकड पळवल्याचा प्राथमिक अंदाज आहे. आतापर्यंतच्या तपासात १२ कोटींची रोकड पळवल्याची माहिती मिळाली आहे. दरोडेखोरांनी कंपनीतील सीसीटीव्ही फुटेज आणि डीव्हीआरसुद्धा पळवले आहे. दरम्यान, पोलीस घटनास्थळी दाखल झाले असून, पोलीस आयुक्तांनीही घटनास्थळाची पाहणी केली आहे. घटनेचा तपास गुन्हे शाखेकडे सोपवण्यात आला आहे.