म. टा. वृत्तसेवा, नवी मुंबई
हार्बर रेल्वे मार्गावरील नेरूळ रेल्वे स्थानकात तिकीट तपासनीस आनंद हरिश्चंद्र सिंह यांना शिविगाळ व धक्काबुक्की करून धमकी देणाऱ्या अरुण मारुती हंकारे यांना वाशी रेल्वे पोलिसांनी सरकारी कामात अडथळा आणल्याप्रकरणी अटक केली आहे.
या प्रकरणात अटक करण्यात आलेले अरुण हंकारे हे उलवे सेक्टर-३मध्ये राहण्यास आहेत. १७ जानेवारीला त्यांच्या मुलाला ठाणे-पनवेल लोकलमधील प्रथम वर्गाच्या डब्यातून प्रवास करताना हेडटीसी आनंद सिंह यांनी पकडले होते. त्यानंतर त्याला नेरूळ रेल्वे स्थानकातील केबिनमध्ये बसवून ठेवले होते. त्यामुळे मुलाने वडील अरुण हंकारे यांना फोनवरून माहिती दिल्यानंतर हंकारे यांनी मुलाला सोडून देण्याची विनंती केली होती. मात्र सिंह यांनी मुलाला न सोडल्याने हंकारे स्वतः नेरूळ रेल्वे स्थानकात गेले. यावेळी त्यांची सिंह यांच्यासोबत बाचाबाची झाली. रागाच्या भरात त्यांनी धकाकबुक्कीही केली. या घटनेनंतर सिंह यांनी वाशी रेल्वे पोलिस ठाण्यात तक्रार दाखल केली. त्यानुसार त्यांना अटक करण्यात आल्याची माहिती वरिष्ठ पोलीस निरीक्षक नंदकिशोर सस्ते यांनी दिली.