नवी मुंबई : खोपोली नगरपरिषद येथे उपनगर अभियंता या पदावर कार्यरत असलेले शशिकांत विठोबा दिघे यांना ७५ हजारांची लाच घेताना नवी मुंबई लाच लुचपत प्रतिबंधक विभागाने अटक केली आहे.
या प्रकरणातील तक्रारदाराने खोपोली नगरपरिषदेच्या काजूवडी येथील जलशुद्धीकरण प्रकल्पाच्या जागेभोवती संरक्षक भिंत बांधली आहे. या कामामध्ये कोणतीही मोठी त्रुटी न काढता कामाचे बिल मंजूर करण्यासाठी आणि नगरपरिषदेकडील निविदाधारकाची अनामत लवकरात लवकर मिळवून देणेसाठी दिघे यांनी ७५ हजार रुपये लाचेची मागणी केली होती. यासाठी कामाचे बिलही मंजूर केले होते, मात्र याबाबत नवी मुंबईच्या लाचलुचपत प्रतिबंधक विभागाकडे तक्रार करण्यात आली आहे. त्यानुसार लाचेची रक्कम घेण्यासाठी गुरुवारी खोपोली नगरपरिषदेच्या नवीन इमारतीमध्ये तक्रारदाराला बोलावण्यात आले होते. त्यावेळी लाचलुचपत प्रतिबंधक विभागाच्या अधिकाऱ्यांनी सापळा रचून ७५ हजारांची लाच घेताना दिघे यांना पकडले.