जयंतीनिमित्त मोहम्मद रफी यांच्या आठवणींना उजळा
म. टा. वृत्तसेवा, कल्याण
छत्रपती संभाजी महाराज या मालिकेतील येसूबाई अर्थात प्राजक्ता गायकवाडला पाहण्यासाठी, तिला ऐकण्यासाठी डोंबिवलीकर रसिकांनी गर्दी केली होती. महाराणी पुतळाबाई अर्थात पल्लवी वैद्यने प्राजक्ताला बोलत केले. तर महाराणी येसूबाई यांनी आपल्या दमदार महाराणी शैलीत मालिकेच्या आणि येसूबाई महाराणीच्या पराक्रमाच्या सांगितलेल्या गोष्टी ऐकतानाही प्रेक्षक त्याकाळात जाऊन पोहोचले. शनिवार, २१ डिसेंबरपासून डोंबिवली जिमखान्याच्या वतीने जिमखाना मैदानात सुरू असलेल्या 'उत्सव'चे 'मटा'माध्यम प्रायोजक आहे. २९ डिसेंबरपर्यंत हा 'उत्सव' चालणार आहे.
विविध छोट्या मोठ्या उद्योजकांना हक्काची बाजारपेठ उपलब्ध करून देण्याबरोबरच डोंबिवलीकरांना दररोज लागणाऱ्या वस्तू एकाच व्यासपीठावर उपलब्ध करून देण्यासाठी जिमखान्याने पुढाकार घेत सुरू केलेल्या 'उत्सव'चे हे २३वे वर्ष असून यंदाही अनेकविध नव्या उत्पादकांसाठी हक्काचे व्यासपीठ झाले आहे. 'उत्सव'मधील मेकर लॅब बच्चे कंपनीसाठी आकर्षणाचे केंद्र बनले आहे. अगदी छोट्या म्हणजेच ७ वर्षाच्या मुलांना आवश्यक उपकरणे उपलब्ध करून देत त्यांना ड्रोन, रॉकेट, वायरलेस रोबोट तयार करण्याचे प्रशिक्षण दिले जात असून या लॅबमध्ये प्रशिक्षण घेतलेल्या विद्यार्थ्यांनी बनवलेले रोबोट, पाणीपुरी मशीन यासारख्या विविध वस्तू या प्रदर्शनात मांडण्यात आल्या होत्या. 'उत्सव'ला भेट देणारा बाल चमू या स्टॉलवर थांबून रोबोबरोबर खेळतो. ठाणे वाहतूक विभागाला वाहतूक नियंत्रणाच्या सूचना देण्यासाठी मदत करणारा रोबोही या मुलांनीच तयार केला आहे. तर यंदाच्या 'उत्सव'चे आणखी एक वैशिष्ट्य म्हणजे मोबाइल, लॅपटॉपसह घराची सुरक्षा करणारे विविध अॅप ग्राहकांसाठी पर्वणी ठरले आहेत. हे अॅप नेमके कसे काम करतात हे पाहण्याची ग्राहकांमध्ये उत्सुकता दिसत आहे.
'उत्सव'च्या चौथ्या दिवशी मंगळवारी झी टीव्हीवरील प्रसिद्ध कलाकारांनी स्टेजवर हजेरी लावत प्रेक्षकांना मोहिनी घातली. महाराणी येसूबाई आणि खुमासदार सूत्रसंचालन करणाऱ्या महाराणी पुतळाबाई अर्थात पल्लवी वैद्य आणि अधोक्षज कऱ्हाडे यांनी प्रेक्षकांना खिळवून ठेवले. तर सारेगमफेम चैतन्य कुलकर्णी, अमृता खाडिलकर-नातू आणि झी युवा सिंगर जगदीश चव्हाण यांच्या एकापेक्षा एक गीतांनी रसिकांना मोहिनी घातली. तर कोरिओग्राफर सॅड्रिक डिसुझा आणि धनश्री ढोमसे यांनी सादर केलेल्या अप्रतिम नृत्याविष्काराने प्रेक्षकांना थिरकण्यास भाग पाडले.
मोहम्मद रफी यांच्या जयंतीनिमित्त त्यांना श्रद्धांजली वाहताना चैतन्य कुलकर्णी याने 'तुमने मुझे देखा', 'गुलाबी आँखे जो तेरी देखी', 'आजा-आजा मैं हूँ' , 'तारीफ करू क्या उसकी' यासारखी एकापेक्षा एक सदाबहार गाणी अनोख्या अंदाजात सादर केली.