शाळांमध्ये विठुनामाचा गजर

ठाणे : हरिनामाचा गजर, टाळ-मृदंगाचा नाद, विठ्ठलाचा जयघोष करत पायी निघालेले वारकरी, विठ्ठल-रखुमाईच्या साजिऱ्या वेषातील बाळगोपाळ… विठ्ठलभक्तीत तल्लीन झालेले हे दृश्य मंगळवारी ठाण्याच्या शाळांमध्ये दिसले. जिल्ह्यातील विविध शाळांनी आषाढी एकादशी मोठ्या आनंदात साजरी केली.

शहरातील इंदिरा गांधी शाळा, सरस्वती शाळा, ब्राह्मण शाळा, कल्याणची बालक मंदिर शाळा, मुंब्र्यातील ज्ञानदीप शाळा , मुरबाड येथील बुरसुंगे शाळा, बदलापूर येथील शिवभक्त विद्यामंदिर, शंभूराजे प्राथमिक विद्यामंदिर, सिंड्रेला इंग्लिश स्कूल आदी शाळांनी आषाढी एकादशी साजरी केली. भक्ती व श्रद्धेची परंपरा जपत निसर्गपूजेचा संदेश देत ज्ञानदीप विद्यामंदिर या शाळेतील छोट्या वारकऱ्यांचा दिंडीसोहळा पार पडला. बदलापूरच्या शाळेतील विद्यार्थ्यांनीही दिंडी काढली. भारतरत्न इंदिरा गांधी शाळेत वृक्षदिंडी काढत वृक्षरोपणाचा संदेश देण्यात आल्याचे मुख्याध्यपिका पूजा कुलकर्णी यांनी सांगतले. जि. प. प्राथमिक बुरसुंगे शाळेच्या विद्यार्थ्यांनी आंबा, पेरू, चिकू, काजू या पाच कलमी रोपांची लागवड शाळेच्या परिसरात केली. कल्याणच्या बालक मंदिर शाळेनेही शहराच्या विविध चौकांत वृक्षारोपण करत आषाढी एकादशी साजरी केली.