म. टा. वृत्तसेवा, रावेर
जळगाव जिल्ह्यातील रावेर तालुक्यातील नवीन निंबोल येथील विजया बँकेवर दोन दरोडेखोरांनी सशस्त्र दरोडा टाकण्याच्या प्रयत्न केला. यावेळी दरोडेखोरांच्या गोळीबारात बँकेचे सहाय्यक व्यवस्थापक करणसिंह नेगी (वय ३१) यांचा मृत्यू झाला. यानंतर दोघे दरोडेखोर पसार झाले. नाशिकमध्येही गत शुक्रवारी (दि. १४) मुत्थूट फायनान्सवर याच पद्धतीने दरोडा पडला होता व दरोडेखोरांनी केलेल्या गोळीबारात कर्मचाऱ्याचा मृत्यू झाला होता.
याबाबतचे वृत्त असे की, मंगळवारी दुपारी सव्वादोन ते अडीचच्या सुमारास नवीन निंबोलमधील भरवस्तीत असलेल्या विजया बँकेत (बँक ऑफ बडोद्यात विलीन झालेली) मोटरसायकलवर आलेल्या दोघा हेल्मेटधारी व्यक्तींनी प्रवेश करीत पैसे लुटण्याचा प्रयत्न केला. यावेळी बँकेचे सहाय्यक व्यवस्थापक करणसिंह नेगी यांनी विरोध केला असता, एका दरोडेखोराने स्वत:जवळील पिस्तुलातून त्यांच्यावर एक गोळी झाडली. गोळी नेगी यांच्या उजव्या खांद्याजवळ लागली. यामुळे ते गंभीर जखमी झाले. शेजारीच असलेले रोखपाल महेंद्रसिंह राजपूत यांच्यावरही दरोडेखोरांनी पिस्तूल रोखले. मात्र, राजपूत सायरन वाजविण्यासाठी खाली वाकल्याने बचावले. सायरन वाजताच आजूबाजूच्या नागरिकांनी बँकेकडे धाव घेतली. नेगी यांना गंभीर अवस्थेत उपचारार्थ खासगी रुग्णालयात दाखल करण्यात आले. मात्र, तोपर्यंत त्यांचा मृत्यू झाला होता. या घटनेमुळे परिसरात भीतीचे वातावरण पसरले असून, पोलिसांनी घटनास्थळी दाखल होत पंचनामा केला आहे. पोलिस अधीक्षक डॉ. पंजाबराव उगले, उपविभागीय अधिकारी नरेंद्र पिंगळे यांनीही घटनास्थळी भेट देऊन पाहणी करीत दरोडेखोरांच्या शोधार्थ पथके रवाना केली.
सविस्तर वृत्त...२