ठाणे: रिक्षाचालकाचा TMT बस चालकावर हल्ला

मटा ऑनलाइन वृत्त | ठाणे

ठाण्यात रिक्षाचालकांची मुजोरी सुरूच असून एका रिक्षाचालकाने ठाणे परिवहनच्या बस चालकावर हल्ला केल्याची घटना रविवारी संध्याकाळी घडली. बसच्या पुढे जाऊ दिले नाही म्हणून त्याने हा हल्ला केला. त्यानंतर बसची काच फोडून तेथून पसार झाला, अशी माहिती पोलिस सूत्रांनी दिली.

ठाणे परिवहनची बस रेल्वे स्थानक येथून लोढा कॉम्प्लेक्सकडे जात होती. परम रुग्णालयाजवळ पुढे जाऊ न दिल्याने रिक्षाचालकाने रागातून बस चालकावर हल्ला केला. तसेच पेव्हर ब्लॉकने बसची काच फोडली. त्यानंतर तेथून पसार झाला. या घटनेत एक प्रवासी जखमी झाल्याचे समजते. सार्वजनिक मालमत्तेचे नुकसान केल्याप्रकरणी राबोडी पोलिसांनी रिक्षाचालकाविरोधात गुन्हा दाखल केला आहे.