रिक्षाचालकाला मारहाण

कल्याण : डोंबिवलीत रिक्षाचालकाचे अपहरण करून त्याला बेदम मारहाण केल्याप्रकरणी भाजपच्या रिक्षा संघटनेच्या पदाधिकाऱ्यांविरोधात गुन्हा दाखल करण्यात आला आहे. दरम्यान, अपहरणाची घटना सीसीटीव्हीत कैद झाली आहे. रामनगर पोलिस ठाण्यात दत्ता माळेकर, रवि माळेकर आणि इतर ५ ते ६ जणांच्या विरोधात अपहरण, मारहाणीचा गुन्हा दाखल करण्यात आला आहे.

डोंबिवली पूर्वेकडील शेलार नाका परिसरात राहणाऱ्या बाबासाहेब कांबळे या रिक्षाचालकाला शनिवारी रात्री काही जणांनी जानकी हॉटेल परिसरातून रिक्षातून उचलून नेल्याची माहिती त्याच्या कुटुंबीयांना मिळाली. त्यामुळे त्याचा भाऊ सिद्धार्थ याने घटनास्थळी धाव घेतली असता बाबासाहेब रक्तबंबाळ अवस्थेत शेलार नाक्यावर आढळून आला. त्याने दत्ता माळेकर, रवी माळेकर आणि त्यांच्या ५ ते ६ साथीदारांनी आपल्याला अपहरण करून उचलून नेत अज्ञातस्थळी नेऊन रॉड, वायरच्या साहाय्याने मारहाण केल्याची माहिती दिली. त्यानंतर त्याला तातडीने डोंबिवलीच्या शास्त्रीनगर रुग्णालयात नेण्यात आले. प्रकृती गंभीर झाल्याने मुंबईच्या केईएम रुग्णालयात स्थलांतरित करण्यात आले. ज्या ठिकाणाहून बाबासाहेबला उचलून नेण्यात आले तेथील हॉटेलच्या सीसीटीव्ही कॅमेऱ्यात आरोपी कैद झाले आहेत. याप्रकरणी रात्री उशिरा भाजपच्या रिक्षा संघटनेचे पदाधिकारी दत्ता माळेकर, रवी माळेकर आणि इतर ५ ते ६ जणांच्या विरोधात अपहरण, मारहाणीचा गुन्हा दाखल करण्यात आला आहे. मात्र अद्याप कुणालाही अटक करण्यात आलेली नाही. तर पोलिसांनीही याबाबत काहीही बोलायला नकार दिला. या प्रकरणी आरपीआय आठवले गटाच्या कार्यकर्त्यांनी आरोपीला लवकरात लवकर अटक झाली नाही, तर आंदोलन करण्याचा इशारा दिला आहे.