प्रामाणिक रिक्षाचालकाकडून ‘दिवाळीभेट’

लाखोंचा ऐवज मिळाला परत

म. टा. वृत्तसेवा, कल्याण

काही रिक्षाचालकांच्या मुजोरीमुळे रिक्षाचालकांची प्रतिमा मलीन होत असतानाच कल्याणात मात्र एका रिक्षाचालकाने त्यांच्या रिक्षात प्रवाशाने विसरलेली लाखोंचे दागिने असलेली बॅग महिलेला परत करत प्रामाणिकपणाचे उदाहरण दिले आहे. हा प्रामाणिकपणा दाखवणाऱ्या गणेश कुंभारकर याचे सर्व थरांतून कौतुक होत आहे.

कुर्ला येथे राहणाऱ्या जयश्री निर्भवणे भावासोबत दिवाळीनिमित्त नगरला निघाल्या होत्या. मात्र एसटी कर्मचाऱ्यांच्या संपामुळे त्यांना बसच न मिळाल्याने ते कल्याणला राहणाऱ्या नातेवाईकाकडे रिक्षेतून निघाल्या. रिक्षातून उतरून घरी गेल्यानंतर त्यांना आईला देण्यासाठी काही दागिने, भेटवस्तू आणि पैसे असा अंदाजे लाखभर रुपयांचा ऐवज असलेली बॅग हरवल्याचे लक्षात आले आणि त्यांच्या पायाखालची जमीन सरकली. त्यांनी थेट खडकपाडा रिक्षाथांब्यावर धाव घेत बॅगेची चौकशी सुरू केली. या दरम्यान तेथील पेपरचा स्टॉलधारकाने तुमची बॅग खडकपाडा पोलिस ठाण्यात सुखरूप ठेवली असल्याचे सांगितले. त्यांनी नातेवाईकांसह खडकपाडा पोलिस ठाण्यात धाव घेत बॅग ताब्यात घेत दागिने तपासून पाहिले असता ते जसेच्या तसे होते. ही बॅग रिक्षाचालक गणेश कुंभारकर यांनी पोलिसांच्या स्वाधीन केली होती, तसेच रिक्षास्टँडजवळील पेपर स्टॉलचालकाकडे ही बॅग पोलिस स्टेशनला जमा केल्याचे सांगून ठेवले होते. त्यामुळे या महिलेला त्यांची बॅग सहजच ‌मिळाली.