​ नगररचनाकारच्या अंतरिम जामिनाला मुदतवाढ

म. टा. वृत्तसेवा, अंबरनाथ

नगरपरिषदेतील सहाय्यक नगररचनाकार विद्यासागर चव्हाण यांचे लाचखोरीचे प्रकरण ताजे असतानाच, त्यांच्याविरोधात चितळघर येथे बलात्काराचा गुन्हा दाखल झाला. या गुन्ह्यातही त्यांना ३१ डिसेंबरपर्यंत अंतरिम जामीन मिळाला होता. यावर शनिवारी झालेल्या सुनावणीत या जामिनाला ९ जानेवारीपर्यंत मुदतवाढ देण्यात आली.

५ डिसेंबर रोजी अंबरनाथ पूर्वेकडील अनंत जाधव यांच्याकडून विकास हक्क प्रमाणपत्र मिळवण्यासाठी चव्हाण यांनी २५ हजार रुपयांची लाच मागितली. याप्रकरणी मुंबई युनिटच्या एसीबी पथकाने अंबरनाथ नगरपरिषदेत चव्हाण यांच्यावर लाचखोरी प्रकरणात सापळा रचला होता. मात्र एसीबीच्या पथकाला गुंगारा देत चव्हाण पसार झाले. या प्रकरणी चव्हाण यांनी मंबईच्या वरळी न्यायालयातून अंतरीम जामीन मिळवला. चव्हाण यांच्याविरोधात १९ डिसेंबर रोजी ठाणे येथील चितळसर पोलिस ठाण्यात आयपीसी ३७६प्रमाणे बलात्काराचा गुन्हा दाखल करण्यात आला होता. या गुन्ह्यातही त्यांनी ३१ डिसेंबरपर्यंत अंतरिम जामीन मिळवला. ही मुदत संपल्यानंतर शनिवारी ठाणे न्यायालयात झालेल्या सुनावणीत चव्हाण यांच्या अंतरिम जामिनाला ९ जानेवारीपर्यंत मुदतवाढ देण्यात आल्याची माहिती चितळसर पोलिस ठाण्याचे गुन्हे विभागाचे पोलिस निरीक्षक रवि चौधरी यांनी दिली. तसेच आमच्याकडे चव्हाण यांच्याविरोधात भक्कम पुरावे असल्याने पुढील सुनावणीत जामीन फेटाळण्याचे प्रयत्न करणार असल्याचे रवि चौधरी यांनी सांगितले.