म. टा. वृत्तसेवा, ठाणे
बेकायदा बांगलादेशी तरुणीला आश्रय देणे दुकलीला चांगलेच भारी पडले आहे. ठाणे पोलिसांच्या अनैतिक मानवी वाहतूक प्रतिबंध कक्षाने दुकलीसह बांगलादेशी तरुणीला अटक केली असून मानपाडा पोलिस ठाण्यात गुन्हा दाखल करण्यात आला आहे.
मानपाडा येथील निळजे गावात असणाऱ्या गोकुळधाम कॉम्प्लेक्समध्ये बांगलादेशी घुसखोर राहत असल्याची माहिती वरिष्ठ पोलिस निरीक्षक रवींद्र दौंडकर यांना मिळाली होती. त्यानुसार दुपारी पोलिस पथकाने कॉम्प्लेक्समध्ये छापा मारून अंजू हासिम बेपारी उर्फ अंजू हासिम सरकार (२०) हिला ताब्यात घेतले. या तरुणी बेकायदा भारतात वास्तव्य करत होती. तर, अंजू ही बांगलादेशी नागरिक असतानाही तिच्या राहण्याची व्यवस्था करणाऱ्या शिरीन उर्फ राणी शेख (२३) आणि नितीन पाटील (२८) या दोघांनाही पोलिसांनी अटक केली आहे. या कारवाईत पोलिसांनी ४८ हजार २५० रुपायांचा मुद्देमालही जप्त केला आहे. सहाय्यक पोलिस निरीक्षक शीतल मदने तपास करत आहेत. याप्रकरणी पोलिस हवालदार राकुमार तरडे यांनी तक्रारी दिली आहे.