डॉक्टरांसह पोलिसांनाही मारहाण

ठाण्यात रुग्णांच्या नातेवाईकांचे कृत्य; तिघांना अटक

म. टा. वृत्तसेवा, ठाणे

उपचारासाठी आणलेल्या रुग्णाला डॉक्टरांनी मृत घोषीत केल्यानंतर संतापलेल्या नातेवाईकांनी ठाण्याच्या मानपाडा परिसरातील टायटन हॉस्पिटलमधील डॉक्टरांसह पोलिसांनाही मारहाण केल्याची घटना गुरुवारी रात्री घडली. याप्रकरणी ११ जणांविरोधात गुन्हा दाखल झाला असून, तिघांना अटक करण्यात आली आहे.

कापूरबावडी येथील आमराई झोपडपट्टीत राहणाऱ्या वासू दत्ताप्पा बेलगिरे (५५) या रुग्णाला टायटन रुग्णालयात उपचारासाठी दाखल केल्यानंतर तो मृत असल्याचे डॉक्टरांनी घोषित केले. मात्र, ‘वासू यांचा मृत्यू झालेला नसून तुम्ही उपचार करा’, असा तगादा नातेवाईकांनी लावला. त्यातून डॉ. अब्रार खान यांना नातेवाईकांकडून जबर मारहाण करण्यात आली. त्याबाबतचे वृत्त समजल्यानंतर पोलिस हवालदार जहांगीरअली सैय्यद आणि एस. डी. मेंगडे रुग्णालयात पोहचले. त्यांच्यावरही जमावाने दगडफेक केली. त्यात ते जखमी झाले. दगडफेकीत रुग्णालयाचे अन्य तीन कर्मचारीही जखमी झाले आहेत.

याप्रकरणी चितळसर मानपाडा पोलिसांनी बाबा वाघमारे (३०), सागर गरगडे (२३), साईराम गरगडे (२४) यांना अटक केली असून अन्य ८ जण पसार झाले आहेत.

मारहाण करत असताना एका हल्लेखोराच्या हाताला जखम झाली होती. त्याच्यावरही टायटन हॉस्पिटलच्या डॉक्टरांनी उपचार केले. त्याशिवाय रुग्णालयातील गोंधळ आणि मारहाणीमुळे पोलिस हवालदार सैय्यद यांचा रक्तदाब वाढून त्यांना चक्कर आली. त्यांच्यावरी तात्काळ उपचार करण्यात आले.