म. टा. वृत्तसेवा, वसई
वसईत नातळनिमित्त घरोघरी विद्युत रोषणाई करण्यात आली आहे. ही रोषणाई लक्ष वेधून घेत आहे. दुसरीकडे वसईतील सर्व चर्चदेखील नव्याने सजले असून त्यांनादेखील रोषणाई करण्यात आली आहे.
नाताळनिमित्त वसई धर्म प्रांतात असलेल्या सर्व चर्चना रंगरंगोटी करण्याचे काम नाताळच्या एक महिना आधीपासूनच सुरू करण्यात आले होते. त्यानुसार चर्चमध्ये आणि चर्चबाहेर आकर्षक अशी विद्युत रोषणाई करण्यात आली. स्टार्स, ख्रिसमस ट्री, फुले, विद्युत रोषणाई करून चर्चना सजविण्यात आले. दुसरीकडे वसईतील प्रत्येक ख्रिस्ती बांधवांच्या घराला सजविण्यात आले आहे. त्याला बाहेरून विद्युत रोषणाई करण्यात आली आहे. वसईतील ऑलविन परेरा यांनी आपल्या संपूर्ण घराला रोषणाई केली असून त्यांनी दुबई येथे असलेल्या बूर्ज खलिफासारखी संगीतबद्ध रोषणाई आपल्या घराला केली आहे. ही रोषणाई करण्यासाठी त्यांनी महिनाभर मेहनत घेतली. सध्या ही रोषणाई बघण्यासाठी नागरिक गर्दी करत आहेत.
आर्च बिशप फेलिक्स मच्याडो यांचा नाताळ संदेश
शहरातील परिसरातील शेवटपर्यंतची वस्ती आपल्या अंतर्मनातील वेदनांचे ठोके आहेत, ती आपल्या आत्म्याची स्पंदने आहेत. आज ते आपल्याकडून होणार या पवित्र सेवा कार्याची वाट पाहत आहेत. आपण दिलेले नि:स्वार्थी सेवादान शहरे आणि महानगरांच्या वेशीच्या शेवटच्या टोकापर्यंत असलेल्या लोकांना जीवनदान देऊ शकेल. तीच नाताळची खऱ्या अर्थाने आठवण ठरेल. या वर्षीच्या नाताळ प्रसंगी माझी हीच एक प्रार्थना आपण ज्या प्रांतात राहतो, ती वस्ती बंधुत्वाच्या नात्याने जोडली जावी.