म. टा. वृत्तसेवा, पालघर
जव्हार व डहाणू तालुक्यातील आदिवासी व पालकांच्या बेमुदत उपोषाणानंतर आदिवासी विकास प्रकल्पाने ६३ आदिवासी मुलांचे समायोजन शहापूर तालुक्यातील आघई येथील आत्मा मलिक इंग्रजी माध्यमाच्या शाळेत केले. या निर्णयानंतर मंगळवारी हे उपोषण मागे घेण्यात आले.
पुणे जिल्ह्यातील चिखली येथील प्रज्ञानबोधिनी नामांकित इंग्रजी माध्यमाच्या शाळेत काही त्रुटी असल्यामुळे आदिवासी विकास विभागाने त्या शाळेची मान्यता रद्द केली. या शाळेतील ६३ मुलांचे समायोजन इतर इंग्रजी माध्यमाच्या शाळेत करण्यात येईल, असे पालकांना सांगितले होते. मात्र शाळा सुरू होऊन तीन महिने उलटले तरीही या ६३ मुलांचे समायोजन आदिवासी विभागाने कुठेच केले नव्हते. मुलांच्या पालकांनी अनेक वेळा लेखी निवेदन देऊनही मार्ग निघत नव्हता, अखेर त्या आदिवासी मुलांच्या पालकांनी मुलांना घेऊन आदिवासी विकास प्रकल्पासमोर बेमुदत उपोषणाचा मार्ग अवलंबला. यानंतर आदिवासी विकास विभागाने ६३ विद्यार्थ्यांचे समायोजन शहापूर तालुक्यातील आघई येथील आत्मा मलिक इंग्रजी माध्यमाच्या शाळेत केले.