भिवंडी पालिका दिवाळखोरीत

महसुली उत्पन्नात घट; विकासकामांवर परिणाम

म. टा. वृत्तसेवा, ठाणे

कमी महसुली उत्पन्नामुळे भिवंडी-निजामपूर महापालिकेला नागरी सुविधा पुरवणे पालिकेला अवघड होऊन बसले आहे. शहरातील विकासकामांवरही विपरित परिणाम झाला असून निधीअभावी कामे प्रलंबित आहेत. त्यामुळे योजनांच्या माध्यमातून उत्पन्न वाढवण्यासाठी पालिकेने प्रयत्न सुरू केले असून ‘अभय योजना टप्पा २’ ही योजना राबवण्यात येत आहे. मात्र आर्थिक दिवाळखोरीत असलेल्या भिवंडी पालिकेला या योजनेने नवसंजीवनी मिळेल का, हा मोठा प्रश्न आहे.

मागील आर्थिक वर्षात, सन २०१६-२०१७ मार्चअखेर भिवंडी पालिकेची एकत्रित वसुली अवघी १६ टक्केच झाली होती. तर, आतापर्यंतची वसुली सहा टक्के झाली असून करवसुलीत वाढ करण्यासाठी पालिकेने पाहिल्या टप्प्यात १४ जुलै ते १५ ऑगस्ट २०१७ दरम्यान अभय योजना राबविली होती. एकूण ९ कोटी ४ लाख ४८ हजार ९० रुपये वसूल झाले होते. प्रत्यक्षात जमा रक्कम ७ कोटी ६५ लाख असून १ कोटी ३९ लाख ४८ हजार ९० रुपये इतकी व्याजाच्या रकमेत सूट दिली आहे. ६ हजार १७७ मालमत्ताधारकांकडून ही वसुली करण्यात आली आहे. मात्र या योजनेला अल्प प्रतिसाद मिळाल्याने पालिकेच्या महसुली उत्पन्नात तितकीशी वाढ झाली नाही. कमी महसुली उत्पन्नामुळे पुन्हा अभय योजना टप्पा क्रमांक दोन राबविण्याचा निर्णय पालिकेने घेतला. त्यानंतर १७ ऑक्टोबर ते १७ नोव्हेंबर या कालावधीत पुन्हा अभय योजना राबवण्यात येत असून पहिल्या टप्प्याप्रमाणे व्याजात १०० टक्के सूट देण्यात आली आहे. कमी महसुली उत्पन्नामुळे शहरातील विकासकामे थांबली आहेत. मार्च २०१८ अखेरपर्यंत वसुली १०० टक्क्यांपर्यंत गेल्यास विकासकामांसाठी निधी उपलब्ध होईल, अशी शक्यता पालिकेने व्यक्त केली आहे.