दिग्गजांना धक्का

म. टा. वृत्तसेवा, उल्हासनगर

उल्हासनगर महापालिकेची यंदाची निवडणूक अनेकांसाठी सुरुवातीपासूनच धक्कादायक ठरली आहे. या निवडणुकीतील धक्कातंत्र निकालापर्यंत सुरू राहिले. या निकालात अनेक मोठ्या चेहऱ्यांना पराभवाचा सामना करावा लागला आहे.

आशा इदनानी

साई पक्षाने सत्तेच्या चाव्या आपल्याकडे ठेवल्या असल्या, तरी पक्षप्रमुख जीवन इदनानी यांच्या पत्नी आणि माजी महापौर आशा इदनानी यांना पराभवाचा सामना करावा लागला. पक्षात एकीकडे आनंद तर दुसरीकडे दुःखाचे वातावरण आहे.

जया साधवानी

काँग्रेस पक्षाचे अस्तित्व पणाला लागले असताना काँग्रेसच्या माजी उपमहापौर आणि पक्षाचा महत्त्वाचा चेहरा जया साधवानी यांचा पराभव पक्षासाठी मोठा धक्का मानला जात आहे.

मनोज लासी

टीम ओमी कलानीच्या रचनेत महत्त्वाची भूमिका बजावणारे आणि पक्षातील महत्त्वाचे नेते आणि ओमी कलानी यांचे जवळचे मनोज लासी यांचा अवघ्या काही मतांनी पराभवाचा सामना करावा लागला आहे.

राजा गेमनानी

भाजपचे प्रवक्ते आणि स्वबळावर लढताना पक्षात महत्त्वाची भूमिका बजावणारे पॅनल क्रमांक १७मधील भाजपचे राजा गेमनानी यांचाही पराभव झाला आहे.

पंचशीला पवार, नाना पवार

प्रभाग क्रमांक १२मधून माजी महापौर पंचशीला पवार आणि त्यांचे पती नाना पवार यांनाही पराभवाचा सामना करावा लागला. हा आरपीआय पक्षाला मोठा धक्का मानला जात आहे.

सुमीत चक्रवर्ती, प्रवीण कृष्णानी

प्रभाग क्रमांक ११मधून उद्योग क्षेत्रातील मोठे नाव असलेले मात्र एकमेकांचे कट्टर विरोधक सुमीत चक्रवर्ती आणि प्रवीण क्रिष्णानी यांनाही पराभव चाखावा लागला आहे.

सविता पारवानी, नरेंद्र दवणे

राम पारवानी यांच्या पत्नी सविता पारवानी तसेच प्रभाग १०मध्ये मनसेतून भाजपमध्ये गेलेले नरेंद्र दवणे यांना पराभवाचा सामना करावा लागला आहे.