मोटारचालकाने पोलिसाला फरफटत नेले...

म. टा. वृत्तसेवा, ठाणे

मुंबईच्या दिशेने भरधाव निघालेल्या एका मोटारीला अडवणाऱ्या पोलिस कॉन्स्टेबलच्या अंगावरच मोटार घालण्याचा प्रकार मंगळवारी रात्री ठाण्यात घडला. या प्रकारात संबंधित कॉन्स्टेबल मोटारीच्या बोनेटवर पडला. मात्र अशाच स्थितीत मोटारचालकाने कॉन्स्टेबलला सुमारे ५ किमीपर्यंत फरफटत नेले. याप्रकरणी नौपाडा पोलिस ठाण्यात गुन्हा दाखल करण्यात आला असून पोलिसांनी मोटारचालकाला अटक केली आहे.

कॉन्स्टेबल रेवणनाथ शेकडे मंगळवारी रात्री पावणेअकराच्या सुमारास व्हॅनमधून नितीन कंपनी जंक्शन येथून येत होते. त्यावेळी एक मोटार वेगात मुंबईच्या दिशेने जात असल्याची कंट्रोल रूममधून माहिती मिळाल्यानंतर शेकडे यांनी मोटारीचा पाठलाग सुरू केला. तीनहात नाक्यापासून काही अंतरावर त्यांनी पोलिस व्हॅन मोटारीपुढे आणून थांबवली. मोटारीत एक महिलाही होती. शेकडे व्हॅनमधून उतरले आणि चौकशीसाठी कारजवळ जात असतानाच अचानक चालकाने मोटार सुरू केली. मोटारीच्या धक्क्याने शेकडे बोनेटवर पडले. तरीही कारचालक थांबला नाही. बोनेटवर असलेल्या शेकडे यांनी मोटारीचे वायपर पकडून ठेवले होते. त्याच अवस्थेत मोटारचालकाने कोपरी सर्कल, तीनहात नाका मार्गे सर्व्हिस रोडवरील समुद्र हॉटेलपर्यंत फरफटत नेले. हॉटेलजवळ कार आल्यानंतर लोकांनी कार थांबवली. तसेच त्यांनी मोटारीच्या काचाही फोडल्या. या प्रकारात शेकडे किरकोळ जखमी झाले असून, कारचालक नवीन रामबागी (२९) रा. कल्याण याला अटक करण्यात आल्याचे एपीआय प्रशांत आवारे यांनी सांगितले.