म. टा. प्रतिनिधी, ठाणे
हॉटेलमध्ये येणाऱ्या ग्राहकांच्या एटीएम कार्डमधील डाटा एका डिव्हाइसद्वारे बनावट कार्डामध्ये भरून देशभरातील विविध बँकांच्या एटीएममधून पैसे काढत लाखो रुपयांची फसवणूक करण्यात येत असल्याची धक्कादायक बाब मध्यवर्ती गुन्हे शोध कक्षाच्या कारवाईतून पुढे आली आहे. या प्रकरणी ठाण्यातून एका युवकाला अटक करत नौपाडा पोलिस ठाण्यात चौघांविरुद्ध गुन्हा दाखल करण्यात आला आहे.
मध्यवर्ती गुन्हे शोध कक्षाच्या पथकाने मंगळवारी रात्री ठाणे रेल्वे स्थानक परिसरातून शहबाज मोहम्मद आरिफ खत्री (३०) याला ताब्यात घेतले. यावेळी त्याच्या घेतलेल्या अंगझडतीत आधारकार्ड, पॅनकार्ड, एटीएम, डेबिट कार्ड, व्हिसा कार्ड आणि मोबाइल आदी मुद्देमाल सापडला. मुंब्रा येथील शैलेशनगरमध्ये राहणाऱ्या शहबाज याच्याकडे पोलिसांनी केलेल्या चौकशीत खळबळजनक माहिती समोर आली. त्याच्याकडे असलेले आधारकार्ड आणि पॅनकार्ड बनावट होते. बँकांचे एटीएम कार्डही बनावट तयार केल्याची माहिती त्याने पोलिसांना दिली. हॉटेलमध्ये काम करणारे केशव रेड्डी उर्फ बाबू आणि मोहमद वरसुद्दीन अन्सारी हे दोघे नकळत ग्राहकांच्या एटीएम कार्डमधील डाटा मिनी डीएस ३ या डिव्हाइसच्या माध्यमातून चोरी करत असत. हा डाटा विकत घेणाऱ्या शहबाज आणि त्याचा साथीदार आसिफ शेख (रा. मुंब्रा) दोघे मिळून डाटा बनावट एटीएम कार्डमध्ये भरून क्लोन केलेल्या बोगस डेबिट कार्डद्वारे ठाणे, कल्याण-डोंबिवली, पुणे आदी महाराष्ट्रातील तसेच देशभरातील विविध बँकाच्या एटीएममधून पैसे काढत होते. अशाप्रकारे आरोपी लाखो रुपयांचा अपहार करत असल्याची बाब पुढे आली. नोव्हेंबर २०१७पासून फसवणुकीचा खेळ चालला असल्याची बाब पोलिसांच्या चौकशीत उघड झाली आहे.