चिकू महोत्सवात मान्यवरांचे मत
म. टा. वृत्तसेवा, पालघर
निसर्गसुंदर समुद्रकिनारा लाभलेल्या पालघर जिल्ह्यातील बोर्डीमध्ये पर्यटनाच्या दृष्टीने मोटी क्षमता असून ती विकसित करण्याची गरज आहे, असे मत पर्यटनासह विविध क्षेत्रातील मान्यवरांनी नुकतेच चिकू महोत्सवाच्या निमित्ताने व्यक्त केले. जिल्ह्यातील चिकू उत्पादन तसेच पर्यटनाला चालना देण्याच्या उद्देशाने यंदाही डहाणू तालुक्यातील बोर्डी येथे चिकू महोत्सव आयोजित करण्यात आला होता. या महोत्सवाला यंदाही मुंबई-ठाण्यासह नाशिक, पालघर जिल्ह्यासह गुजरातमधील पर्यटकांकडून प्रतिसाद मिळाला. चिकू बागांची सफर, चिकू उत्पादनांसह स्थानिक खाद्यपदार्थ चाखण्याची आणि स्थानिक लोककलांचा आनंद घेण्याची संधी पर्यटकांना या निमित्ताने मिळाली.
१ व २ फेब्रुवारी रोजी हा महोत्सव पार पडला. भारत पर्यटनचे पश्चिम विभागीय प्रादेशिक संचालक वेंकटेशन दत्तात्रेयन यांच्या हस्ते महोत्सवाचे उद्घाटन करण्यात आले. यावेळी पालघरचे खासदार राजेंद्र गावीत, ख्यातनाम पर्यटन व्यावसायिक वीणा पाटील व महोत्सवाच्या आयोजन समितीचे अध्यक्ष अमोल पाटील इत्यादी मान्यवर उपस्थित होते.
'पर्यटनाच्या क्षेत्रात गोव्यानंतर बोर्डीचे स्थान आहे. राज्यमंत्री असताना या भागातील केळी व चिकूसाठी लागू केलेल्या विमा योजनेचा फायदा या भागातील शेतकऱ्यांना मिळू लागला आहे. दापचरी येथे ३०० एकरवर कृषी विद्यापीठ सुरू करण्यास मुख्यमंत्र्यांनी सकारात्मक प्रतिसाद दिला असून सहा महिन्यांत सर्व प्रक्रिया पूर्ण होईल,' असे खासदार राजेंद्र गावीत यांनी सांगितले. तर या चिकू महोत्सवाच्या कक्षा रुंदावून त्याला राष्ट्रीय व आंतरराष्ट्रीय पातळीवर नेणे शक्य असल्याचे मत वेंकटेशन दत्तात्रेयन यांनी व्यक्त केले. 'माझे वडील व पती या महोत्सवाला येत असतात. पण मी पहिल्यांदाच आले व उत्सवाचे भव्य स्वरूप बघून आश्चर्याचा सुखद धक्का बसला,' असे मनोगत वीणा पाटील यांनी व्यक्त केले.
या महोत्सवात दोन्ही दिवस विविध सांस्कृतिक कार्यक्रमांचे आयोजन करून स्थानिक कलाकारांना व्यासपीठ उपलब्ध करून देण्यात आले. जव्हार येथील भगवान कडू या दिव्यांग कलाकाराच्या कागदाच्या लगद्यापासून बनवलेल्या कलाकृतींना मोठी दाद मिळाली. तारापूरचे सुनील सावे, बोईसर येथील महेश नाईक, बोरिवलीचे संतोष पोतदार तर पुण्याचे अजय अढिया आदी पर्यटकांनी चिकू महोत्सवाचा आनंद लुटल्याची प्रतिक्रिया व्यक्त केली.
यावेळी महोत्सवामध्ये प्रथमच चिकू दौडचे (मॅरेथॉन) आयोजन करण्यात आले होते. यामध्ये ६०० स्पर्धकांनी भाग घेतला. भारतीय हॉकी संघाचे माजी कर्णधार धनराज पिल्ले यांनी मॅरेथॉनला हिरवा झेंडा दाखवला. विजेत्यांना पिल्ले यांच्या हस्ते गौरवण्यात आले. केवळ मौजमजा हे उद्दिष्ट न ठेवता या निमित्ताने रक्तदान शिबिराचे आयोजनही करण्यात आले होते. यामध्ये ३० पर्यटकांनी रक्तदान केले.
स्पेनच्या पर्यटकांनी अनुभवली बोर्डीची संस्कृती
युरोपातील स्पेन या देशातून आलेल्या डॉमिंगो, जेझस, जोरेबा, इकेर, एड्रीयानो, झरगम या पर्यटकांनी चिकू महोत्सवाच्या निमित्ताने स्थानिक कलांचा आनंद लुटला. ढोलताशा वादनाचे त्यांनी विशेष कौतुक केले.