सेल्फी काढताना तरुणाचा बुडून मृत्यू

बदलापूर : येथील भोज धरणात पिकनिकसाठी आलेल्या एका तरुणाचा धरणाच्या बांधावर उभे राहून मोबाइलमधून सेल्फी काढत असताना त्याचा अचानक तोल गेल्याने पाण्यात बुडून मृत्यू झाल्याची घटना समोर आली आहे.

बदलापूर येथील पोद्दार कॉप्लेक्स येथे राहणारा चंदनसिंग रावत (२३) हा बदलापुरातील एका हार्डवेअरच्या दुकानात कामाला होता. चंदनसिंग शुक्रवारी भोज धरण येथे मित्रांसोबत फिरायला गेला होता. यावेळी धरणाच्या बांधावर उभा राहत तो आपल्या मोबाइलमध्ये सेल्फी काढत होता. मात्र यावेळी बंधाऱ्यावरून त्याचा पाय घसरल्याने तो धरणाच्या खोल पाण्यात बुडाला, यावेळी त्याठिकाणी असलेल्या नागरिकांनी त्याला पाण्याच्या बाहेर काढत बदलापूर ग्रामीण रुग्णालयामध्ये नेले. मात्र डॉक्टरांनी त्याला मृत घोषित केले. या प्रकरणी कुळगांव पोलिस स्टेशनमध्ये अकस्मात मृत्यूची नोंद करण्यात आलीआहे.