केडीएमटीच्या बसचा ब्रेकफेल

कल्याण : कल्याणकडून मोहनेच्या दिशेने जाणारी केडीएमटीची बस शनिवारी सायंकाळी मोहने फाटकाजवळ पोहोचताच बसचा ब्रेक फेल झाला. यानंतर चालकाने प्रसंगावधान राखत वेग कमी केला. त्यानंतर ही बस मोहने फाटकाजवळील पोलिस चौकीनजीक झाडाच्या बुंध्यावर आदळली. दरम्यान बसमधील सर्व प्रवासी सुखरूप असल्याचे परिवहन विभागाकडून सांगण्यात आले.

कल्याण-डोंबिवली महानगरपालिकेच्या परिवहनची कल्याण ते मोहने कॉलनी बस शनिवारी सायंकाळी पावणेसहा वाजण्याच्या सुमारास शहाड येथून मोहनेच्या दिशेने जात असताना बंदरपाडानजीक एक दुचाकीस्वार मध्ये आल्याने बस चालक हनुमंते कदम यानी बसचा हॉर्न वाजवत ब्रेक दाबण्याचा प्रयत्न केला. मात्र ब्रेक लागला नाही. यावेळी बसमध्ये ८० प्रवासी होते. कदम यांनी प्रसंगावधान राखत उल्हास नदी पूल ओलांडल्यानंतर फाटकाजवळ असणाऱ्या चौकीनजीक झाडाच्या बुंध्याला बस धडकवली. यामुळे मोठी दुर्घटना टळली.