लाचखोर सरकारी वकिलाला अटक

म. टा. वृत्तसेवा, पालघर

पालघरच्या दिवाणी न्यायालयातील सरकारी वकील दिनेश पाटील यांना न्यायालयातच सहा हजार रुपयांची लाच स्वीकारताना ठाणे येथील लाचलुचपत प्रतिबंधक विभागाने अटक केली.

मनोर येथील वीटभट्टी मालक फिर्यादी महेश पाटील याच्या एका न्यायालयीन प्रकरणात सरकारी वकील दिनेश पाटील यानी फिर्यादीकडे पैशांची मागणी केली होती. त्या प्रकरणी फिर्यादीने ठाणे येथील लाचलुचपत प्रतिबंधक विभागाकडे तक्रार दाखल केली होती. लाचलुचपत प्रतिबंधक पोलिस निरीक्षक वाघमारे याच्याकडे ही तक्रार देण्यात आली होती. मंगळवारी दुपारी दीडच्या सुमारास न्यायालयातील सरकारी वकिलांच्या खोलीमध्ये हे पैसे स्वीकारताना पाळतीवर असलेल्या पोलिस निरीक्षक वाघमारे आणि त्यांच्या टीमने सरकारी वकील पाटील यांना रंगेहात पकडून लागलीच अटक केली. न्यायालयाच्या प्रांगणातच असा प्रकार घडल्याने न्यायालयीन कामकाजाबाबत साशंकता व्यक्त केली जात आहे. आरोपी दिनेश पाटील याच्यावर गुन्हा दाखल करण्यात आला आहे.