थोडक्यात ०९/०१
माजी विद्यार्थ्यांचे स्नेहसंमेलन
वसई :
जूचंद्र, नायगाव पूर्व येथील कर्मवीर भाऊराव पाटील विद्यालयामधील १९९४-९५च्या दहावीच्या बॅचच्या २५व्या वर्षपूर्तीबद्दल रजतमहोत्सवी स्नेहसंमेलनाचे आयोजन करण्यात आले आहे. सदर स्नेहसंमेलन कर्मवीर भाऊराव पाटील विद्यालय, जूचंद्र येथे १९ जानेवारी २०२० रोजी सकाळी ९:३० ते १२ या वेळेत होणार आहे. याप्रसंगी स्थानिक स्कूल कमिटीचे अध्यक्ष पुरुषोत्तम पाटील हे प्रमुख पाहुणे, तर शाळेचे मुख्याध्यापक काशिनाथ तळपाडे अध्यक्ष असतील. सदर कार्यक्रमाला दहावी बॅच ९४-९५चे सर्व आजीमाजी शिक्षक उपस्थित असतील. यासाठी कार्यक्रमाला दहावी बॅच ९४-९५च्या सर्व विद्यार्थ्यांनी उपस्थित राहावे, असे आवाहन करण्यात आले आहे.
विद्यार्थ्यांनी पाहिले पोलिसांचे काम
वसई:
नागरिकांचे संरक्षण करतानाच गुन्हेगारांच्या मुसक्या आवळण्याचे काम करणाऱ्या पोलिसांचा कारभार चालतो तरी कसा, याची माहिती घेण्यासाठी वसईत विद्यार्थ्यांनी थेट पोलिस ठाण्यात हजेरी लावली व पोलिस स्थापना दिनाचे औचित्य साधून कामकाजाची माहिती जाणून घेतली. वसई येथील रेल्वे लोहमार्ग पोलिस ठाण्यात जी. जे. वर्तक शाळेचे शिक्षक दिनेश मिसाळ, पर्यवेक्षक अशोक पवार विद्यार्थ्यांसह आले होते. यावेळी शाळकरी मुलांना पोलिस करत असलेल्या कामकाजाची माहिती देण्यात आली. शस्त्र, जेल, दैनंदिन काम, ठाणे अंमलदार, रक्षा विषयक, समाजमाध्यम, सायबर क्राइम, रेल्वे रूळ ओलांडताना होणारे अपघात यांसह पोलिसांसंबंधी माहिती देण्यात आली.