वसा हवा वर्षभराचा
मदर्स डे, फ्रेन्डशिप डे यांसारख्या दिवसांच्या यादीत जागतिक चिमणी दिनाची भर पडली असून गेल्या काही वर्षांपासून हा दिवस थाटामाटात साजरा केला जातो. शालेय पातळीपासून थेट सामाजिक संस्थांतर्फेही साजऱ्या होणाऱ्या या दिवसाच्या निमित्ताने राजकीय नेत्यांचेही फलकही झळकतात. चिमण्यांच्या संवर्धनाबाबत पल्लेदार भाषणे ठोकल्यानंतर कृत्रिम घरट्यांचेही वितरण केले जाते. त्यानंतर सुमारे आठवडाभर पक्षीप्रेमाचे-चिमणीप्रेमाचे भरते येत असले तरी उत्साहाचा हा बहर नंतर ओसरतो. घराघरांतील कृत्रिम घरटी ओस पडलेली दिसून येतात. जागतिक चिमणी दिन साजरा करणे योग्य असले तरी पक्षीसंवर्धनाचा हा उत्साह एका दिवसापुरता मर्यादित न राहता संस्थांसह वैयक्तिक पातळीवरही हे प्रयत्न वर्षभर सुरू राहणे गरजेचे आहे. चिमण्यांना सुरक्षित निवारा गरजेचा असल्याने वृक्षतोड थांबविणे तसेच घराच्या खिडकीत त्याची व्यवस्था करणे यांसारख्या सोप्या पर्यायांद्वारे पक्षीसंवर्धन करता येईल. चिमणी दिनाच्या मुहूर्तावर हाती घेतलेले हे व्रत न विसरता त्याचे पालन वर्षभर झाल्यास दरवर्षी चिमण्या लोप पावत असल्याची खंत व्यक्त करावी लागणार नाही,