अंगावर किलोभर सोनं, मध्यम शरीरयष्टी, भेदक नजर अन् नावाची दहशत, पंढरी फडकेला पोलिसी खाक्या दाखवत बेड्या ठोकल्या

ठाणे : बैलगाडा शर्यतीच्या बैठकीसाठी आलेल्या पंढरी फडके याच्या चालकाकडून राहुल पाटील आणि त्यांच्या समर्थकांवर अंदाधुंद गोळीबार केल्याप्रकरणी अखेर रविवारी रात्री उशिरा पंढरी फडके, एकनाथ फडके आणि हरिशचंद्र फडके या तीन आरोपींना खांदेश्वर येथून पोलिसांनी अटक केली. तर उर्वरित आरोपींचा पोलिस शोध घेत आहेत. मात्र, या गोळीबार प्रकरणामुळे अंबरनाथ शहर हादरले असून, पोलिसांच्या कामगिरीबाबत पुन्हा प्रश्नचिन्ह उपस्थित केले जात आहे.

राज्यात आगामी काळात बैलगाडा शर्यती कोणत्या ठिकाणी आयोजित करायच्या यासंदर्भात एक बैठक आयोजित करण्यासाठी पंढरी फडके आणि राहुल पाटील यांच्या मोबाइलवर मेसेज आला होता. त्यानुसार अंबरनाथ आनंदनगर एमआयडीसीतील बोहनोली गावात ही बैठक होत असल्याचे समजल्याने पंढरी फडके आणि राहुल पाटील आपल्या शेकडो समर्थकांसह रविवारी बोहनोलीकडे निघाले. मात्र, एमआयडीसीच्या प्रवेशद्वाराजवळ सुदामा हॉटेलसमोर दोन्ही गट एकमेकांसमोर येताच, त्यांच्यात झालेल्या शाब्दिक बाचाबाचीतून पंढरी फडके याचा चालक एकनाथ फडके याने आपल्याकडील बंदुकीतून राहुल पाटील यांच्या ताफ्यावर अंदाधुंद गोळीबार केला.

वडिलांवरील आरोप म्हणजे आमच्यावरच व्यक्तीगत हल्ला; आव्हाडांच्या मुलीने खंबीरपणे मांडली बाजू
या गोळीबारात १५ ते २० गोळ्या झाडण्यात आल्या. यानंतर राहुल पाटील यांच्या फिर्यादीवरून अखेर शिवाजीनगर पोलिसांनी पंढरी फडके याच्या विरोधात गुन्हा दाखल केला. तसेच खांदेश्वर पोलिसांच्या मदतीने रविवारी रात्री विहेगर गावातून पंढरी फडके, एकनाथ फडके आणि हरिशचंद्र फडके या तीन आरोपींना अटक करत त्यांचे रिव्हॉल्वरही जप्त केल्याची माहिती वरिष्ठ पोलीस निरीक्षक अशोक भगत यांनी दिली आहे. तसेच तिन्ही आरोपींना सोमवारी उल्हासनगर सत्र न्यायालयात हजर केले असता, न्यायालयाने त्यांना सात दिवसांची पोलीस कोठडी सुनावली आहे.

पंढरी फडके याला गोल्डमॅन म्हणून देखील ओळखलं जातं. यापूर्वीही फडके यावर क्रिकेट सामन्यात शस्त्राचे प्रदर्शन केल्यामुळे पोलिसांनी कारवाई केली होती. मात्र, त्यावेळी त्याने सिनेमात वापरणारे पिस्तुल असल्याचे सांगितल्याने पोलीसांना कारवाई न करताच सोडून द्यावे लागले.