उपचारासाठी मुंबईची वाट धरण्याशिवाय पर्याय नाही
म. टा. वृत्तसेवा, ठाणे
ठाण्यातील सरकारी रुग्णालयात हृदयरोग विभागच नसल्यामुळे गेल्या अनेक वर्षांपासून ठाणेकरांना मुंबई गाठावी लागत आहे. राष्ट्रीय बाल स्वास्थ्य कार्यक्रमांतर्गत सुरू असलेल्या तपासणीमध्ये आढळून आलेल्या ० ते १८ वयोगटातील बालकांवर दोन वर्षांत ४५ हृदय शस्त्रक्रिया करण्यात आलेली आहे. तर सहा वर्षांत ४३६ बालकांवर हृदय शस्त्रक्रिया करण्यात आली आहे. मात्र या उपचारासाठी मुंबईतील जे. जे. आणि ज्युपिटर रुग्णालयात जावे लागले. याशिवाय ठाण्यातील अनेक गरीब रुग्णांना मुंबईतील सरकारी केईएम, जेजे आणि ज्युपिटर रुग्णालयाशिवाय पर्यायच नसल्याचे वास्तव आहे.
ग्रामीण भागातील अनेक रुग्णांना उपचारासाठी जिल्हा रुग्णालय महत्त्वाचा पर्याय आहे. मात्र जिल्हा रुग्णालय असो किंवा महापालिकेचे छत्रपती शिवाजी महाराज रुग्णालय... या सरकारी रुग्णालयात हृदयरोगावय उपचार विभागच नसल्यामुळे हृदयविकार रुग्णांवर तत्काळ उपचारासाठी ठाण्यातील रुग्णांना मुंबईशिवाय पर्याय नाही. खासगी रुग्णालयातील भरमसाठी पॅकेज सर्वसामान्य आणि गरीब रुग्णांना परवडणारी नसल्यामुळे अनेक रुग्ण सरकारी रुग्णालयात उपचार घेत आहेत. ठाण्यात होणार असलेल्या सुपर स्पेशालिटी रुग्णालयात हृदयरोगावर उपचार करणारा विभाग सुरू होईल. मात्र तोपर्यंत ठाण्यातील रुग्णांना मुंबईची वाट धरण्याशिवाय पर्याय नाही.
वर्षातून दोनदा आरोग्यतपासणी
जिल्हा रुग्णालयाकडून दरवर्षी राष्ट्रीय बाल स्वास्थ्य कार्यक्रमांतर्गत ० ते ६ वयोगटातील अंगणवाडीमधील बालकांची तसेच ६ ते १८ वयोगटातील शालेय मुलांची आरोग्यतपासणी केली जाते. अंगणवाडी बालकांची वर्षातून दोन वेळा तर शालेय मुलांची वर्षातून एकदा तपासणी केली जाते. ठाणे जिल्ह्यातील ३५९७ अंगणवाडीमधील ३ लाख ०२ हजार ९१७ बालकांची तपासणी करण्यात आली तर महापालिका, जिल्हा परिषद आणि नगरपालिकेच्या एकूण २२५९ शाळांमधील ४ लाख ०८ हजार ०७८ विद्यार्थ्यांची तपासणी झाली आहे. तर यावर्षी तपासणीमध्ये अंगणवाडीमधील ४७ बालकांना व २६ मुलांना हृदयविकार असल्याचे आढळून आले. त्यापैकी अंगणवाडीच्या ३४ आणि शालेय ११ विद्यार्थ्यांवर ही शस्त्रक्रिया मुंबईत महात्मा फुले आरोग्य योजनेतून मोफत करण्यात आली. तर जिल्हा रुग्णालयात ४०२ बालकांवर इतर शस्त्रक्रिया करण्यात आल्या आहेत. २०१३ पासून २०१७पर्यंत ३९१ बालकांची हृदयशस्त्रक्रिया झाली तर २४५० मुलांवर इतर शस्त्रक्रिया करण्यात आल्या आहेत.