हार्डडिस्कही पोलिसांच्या हाती येईना

बनावट कॉल सेंटरच्या तपशीलाचे गूढच

म. टा. वृत्तसेवा, ठाणे

मिरा रोड बनावट कॉल सेंटर प्रकरणात हार्डडिस्कमध्ये महत्वपूर्ण डाटा असण्याची शक्यता लक्षात घेता अटकेत असलेला आरोपी जगदीश कनानी याला सोबत घेऊन हार्डडिस्कचा शोध घेण्यास सुरुवात केली आहे. पोलिस अधिकाऱ्यांनी मंगळवारी हार्डडिस्कचा शोध घेतला. मात्र हाती काहीच लागले नसल्याचे गुन्हे शाखेतील एका वरिष्ठ अधिकाऱ्याने सांगितले.

बनावट कॉल सेंटरमधून पोलिसांनी शेकडो हार्डडिस्क जप्त केलेल्या आहेत. परंतु, कनानी याने काही हार्डडिस्क वर्सोवा खाडीत फेकल्याचा दावा केल्याने खळबळ उडाली आहे. परंतु त्याचा हा दावा खोटा असल्याचे पोलिस अधिकाऱ्यांचे म्हणणे आहे. तो पोलिसांना गुंगारा देत असल्याचेही बोलले जात आहे. कनानी हा बोरीवलीला राहत असून हार्डडिस्क कचऱ्यात टाकली आहे, घरी ठेवली आहे, असेही तो पोलिसांना सांगत आहे. बनावट कॉल सेंटरबाबतचा तपशील हार्डडिस्कमध्ये असण्याची शक्यता आहे. त्यामुळे ही हार्डडिस्क शोधण्यासाठी गुन्हे शाखेकडून प्रयत्न सुरू आहेत. कॉल सेंटरच्या आर्थिक व्यवहाराचा उलगडा अद्याप झालेला नसल्याने करोडो रुपये गेले कुठे, हा प्रश्न निर्माण झाला आहे. तपासामध्ये हार्डडिस्क महत्त्वाची असल्याने ती कुठे फेकली ती जागा दाखवण्यासाठी मंगळवारी कनानी याला सोबत घेऊन गुन्हे शाखेच्या अधिकाऱ्यांनी हार्डडिस्कचा शोध घेतला. कनानी याच्या घरीही पोलिस जाऊन आले. परंतु, हार्डडिस्क न सापडल्याने गूढ वाढले आहे.

दरम्यान, याच प्रकरणात वागळे इस्टेट गुन्हे शाखेने ताब्यात घेतलेल्या नासिर शेख याच्या चौकशीतून काही लोकांची नावे समोर आली आहेत. याबाबत चौकशीसाठी पोलिसांचे पथक अहमदाबाद येथे गेलेले आहेत.