उल्हासनगरमध्ये कॅनरा बँक खातेदारांचे अकाउंट हॅक

म. टा. वृत्तसेवा, उल्हासनगर

उल्हासनगर येथील कॅनरा बँकेच्या शाखेतून तब्बल १५ खातेदारांचे खाते हॅक करण्यात आल्याची घटना समोर आली आहे. अनेक ग्राहकांच्या खात्यातून रविवारी रात्रीच्या सुमारास हजारो रुपयांचे ऑनलाइन ट्रान्झॅक्शन करण्यात आले. या प्रकारामुळे बँक खातेदारांमध्ये एकच खळबळ उडाली असून सोमवारी ग्राहकांनी बँकेमध्ये जाब विचारत सायबर गुन्हे शाखेकडे धाव घेतली.

उल्हासनगर कॅम्प नंबर ४ परिसरात असलेल्या कॅनरा बँक शाखेतील काही खातेदारांना खात्यातून रविवारी रात्री ऑनलाइन ट्रान्झॅक्शन झाल्याचा अचानक मेसेज आल्याने खळबळ उडाली. याबाबत ग्राहकांनी रात्रीच बँकेच्या ग्राहक सेवा विभागाशी संपर्क केला असता तुमच्या खात्यातून ऑनलाइन पैसे काढण्यात आले असून डेबिट कार्ड तत्काळ बंद करण्याचा सल्ला देण्यात आला. अखेर सकाळच्या सुमारास बँकेत नागरिकांनी धाव घेत गर्दी केली. त्यावेळी तब्बल १५ ग्राहकांच्या खात्यातून हजारो रुपयांचे ट्रान्झॅक्शन झाल्याचे निष्पन्न झाले. याबाबत विठ्ठलवाडी पोलिस ठाण्याचे वरिष्ठ पोलिस निरीक्षक विजय डोळस यांनादेखील माहिती देण्यात आली.