तीन भूमाफियांवर गुन्हा दाखल

पंतप्रधान कार्यालयाने घेतली दखल

म. टा. वृत्तसेवा, कल्याण

अनधिकृत बांधकामावर कारवाई करण्याचे आदेश थेट पंतप्रधान कार्यालयातून आल्यानंतर भूमाफिया वीरेंद्र सिंग, रामकुंवर यादव आणि राधेश्याम यादव यांच्या विरोधात एमआरटीपी कलम ५२, ५३ नुसार मानपाडा पोलिस ठाण्यात गुन्हा दाखल करण्यात आला.

नेवाळीनजीकच्या आडीवली ढोकळी परिसरातील सर्व्हे क्रमांक २२वर सिंग आणि यादव या भूमाफियांनी संगनमताने अनधिकृत इमारती उभारत सरकारचा कोट्यवधी रुपयांचा महसूल बुडवल्याची लेखी तक्रार तक्रारदाराने दररोज एक याप्रमाणे २६२ दिवस आय प्रभाग क्षेत्र अधिकाऱ्याकडे केली होती. मात्र तरीही या बांधकामावर कारवाई होत नसल्यामुळे अखेर त्यांनी थेट पंतप्रधान कार्यालयाकडे तक्रार केली होती.

या तक्रारीची दखल घेत पंतप्रधान कार्यालयाने अनधिकृत बांधकामांवर कारवाई करण्याचे आदेश पालिका प्रशासनाला दिले असून या आदेशानंतर प्रभाग क्षेत्र अधिकारी भारत पवार यांनी संबधित भूमाफियांविरोधात गुन्हा दाखल केल्याचे तक्रारदार सुभाष फुलोरे यांनी सांगितले.