म. टा. वृत्तसेवा, पालघर
नागरिकांना डिजिधन व्यवहाराची सवय लागण्यासाठी व याबाबत प्रोत्साहन देण्यासाठी पालघरच्या जिल्ह्याधिकाऱ्यांनी केळवे येथील शितलाई मंगलधाम सभागृहात १३ जानेवारीला दुपारी तीन वाजता एकदिवसीय डिजिधन मेळावा आयोजित केला आहे.
या मेळाव्यात जिल्ह्यातील विविध बँका, ई-वॉलेट, टेलिकॉम, वाहतूक नेटवर्क कंपन्या, आधारशी संलग्न भरणा (एईपीएस), विक्रेते, व्यापारी संघटना, आपले सरकारचे सेवा केंद्रचालक, रास्त भाव दुकानदार, छोटे विक्रेते आदींना निमंत्रित करण्यात आले आहे.
या मेळाव्याचे विशेष आकर्षण म्हणजे यात सुरक्षित कॅशलेस व्यवहारांबाबत माहिती देण्यात येणार असून विविध डिजिटल प्रदानांसाठी सहाय्य करण्यात येणार आहे. तसेच विविध वस्तू कॅशलेस माध्यमातून विक्रीसाठी उपलब्ध ठेवण्यात येणार आहेत. या ठिकाणी विविध बँकिंग सेवाही उपलब्ध असतील.
केळवे येथील या डिजिटल मेळाव्यात आधार कार्ड नोंदणी / आधार सीडिंग / PVC कार्ड तयार करून मिळणार असून कॅशलेस देवाण-घेवाण संदर्भातील माहिती देण्यांत येणार आहे. हा मेळावा परिसर पूर्णपणे Wi-Fi झोन असेल.
डिजिटल व मोबाइल पॅमेंट व्यवहार स्वंयसेवकामार्फत शिकून घेण्याची सुवर्णसंधी येथे मिळणार आहे. डिजिटल व्यवहाराबाबत आयोजित जिल्हास्तरीय विविध स्पर्धांचे पारितोषिक वितरणही या ठिकाणी होणार असून डिजिटल व्यवहारांसंबंधी भव्य रांगोळी स्पर्धाही आयोजित करण्यात आली आहे. या मेळाव्याला नागरिकांनी मोबाइल फोन, डेबिट कार्ड, बँक पास बुक व आधार कार्ड सोबत घेऊन यावे, असे आवाहन आयोजकांनी केले आहे.