मांजरीचा रास्तारोको

जखमी पिलाच्या मदतीसाठी वाहनचालक सरसावल्याने वीस मिनिटे कोंडी

म. टा. प्रतिनिधी, ठाणे

कंटेनर उलटणे, अपघात घडणे, टँकर बंद पडणे, अशा वेगवेगळ्या कारणांनी तासनतास कोंडीत अडकणारे पूर्वद्रुतगती मार्गावरील वाहनचालक शनिवारी एका वेगळ्याच कारणामुळे वाहतूककोंडीत सापडले होते. पूर्वद्रुतगती महामार्गाच्या उड्डाणपुलावर कुठून तरी भरकटून आलेल्या मांजरीच्या पिल्लाच्या सैरावैरा धावण्यामुळे हा महामार्ग काही काळ थांबला. चेहऱ्याला काहीसा मार लागलेल्या या पिलास आणखी दुखापत होऊ नये यासाठी महामार्गावरील वाहनचालकांनी गाड्या थांबवून त्याला सुखरूप बाहेर तेथून बाहेर काढण्याचा प्रयत्न सुरू केला. परंतु घाबरलेल्या या पिलाने वाहनाखाली दडी मारल्यामुळे पंधरा ते वीस मिनिटे हा महामार्ग खोळंबला होता. अखेर काही चालकांनी त्याला पकडून तेथून बाहेर काढून पाणी पाजून मोकळ्या इमारतीच्या परिसरात सोडल्यानंतर हा मार्ग मोकळा झाला.
रस्त्यावर जखमी झालेल्या आणि घाबरून गेलेल्या एका मांजराला वाचवण्यासाठी ठाण्यातील वाहनचालकांनी पुढाकार घेतला. नाशिक आणि अहमदाबाद या दोन शहरांना मुंबईशी जोडणाऱ्या पूर्वद्रुतगती महामार्गावर वाहनांची मोठी गर्दी असते. शेकडो वाहने एकाचवेळी धावत असल्यामुळे एखादे वाहने थांबले तरी तात्काळ वाहतूककोंडी होण्याची शक्यता असते. दोन्ही बाजूच्या वाहनांना कोणताही अडथळा निर्माण होऊ नये यासाठी वाहतूक पोलिसांकडून विशेष खबरदारीही घेतली जाते. परंतु शनिवारी अचानक या महामार्गावर नितीन कंपनी सिग्नलच्यावरील भागामध्ये एक मांजरीचे पिलू वाहनचालकांना दिसल्यामुळे अनेक वाहनचालक थबकले. काहींनी या मांजरीच्या पिलाला बगल देऊन पुढे जाण्याचा प्रयत्नही केला. परंतु वाहनांच्या या गोतावळ्यामुळे भेदरलेल्या या पिलाने रस्ता मिळेल तिथे पलायन सुरू केले.
मुंबईकडून घोडबंदरच्या दिशेने जाणाऱ्या रस्त्यावर ते गेल्याने तेथील वाहनचालकांनी गाडी थांबवून त्याला रस्त्याच्या बाजूला हाकलण्याचा प्रयत्न केला. त्यानंतर त्याने मुंबईच्या दिशेने जाणाऱ्या रस्त्यावर धाव घेतली. पिलाची ही धावपळ पाहून वाहनचालकांनी गाडी थांबवून त्याला पकडण्याचा प्रयत्न केला. परंतु गाडी थांबल्याने या पिलाने गाडी खाली आसरा घेतला. वाहनचालकांनी रस्त्यात उतरून लपलेल्या या पिलास शोधण्याचा प्रयत्न सुरू केल्याने ते पिलू अधिकच भेदरले. परंतु काही चालकांनी त्याला व्यवस्थित पकडून उड्डाणपुलावरून खाली आणले आणि त्याला रस्त्याच्या बाहेर सोडले. या पिलाच्या नाकाला दुखापत झाली होती. त्याला पाणी पाजून त्याला सोडून देण्यात आले. पंधरा ते वीस मिनिटे हा गोंधळ झाल्याने वाहनांची कोंडी झाली होती. वाहनांच्या उड्डाणपुलावर रांगा लागण्यास सुरुवात झाली होती.परंतु मांजरीचा जीव वाचल्यानंतर सगळ्यांनीच सुटकेचा निश्वास टाकला.