चालिया मंदिरातील दागिने चोरणारा जेरबंद

म. टा. वृत्तसेवा, उल्हासनगर

उल्हासनगर येथील कॅम्प नंबर पाचमधील सिंधी समाजाचे पवित्र धर्मस्थान असलेल्या चालिया मंदिरातील झुलेलाल देवताच्या मूर्तीवरील लाखो रुपयांच्या दागिन्यांची चोरी अखेर उघडकीस आली आहे. या प्रकरणी उल्हासनगरातच एका सराफ दुकानाकडे दागिने विकण्यासाठी चोर आला होता. मात्र सराफाला या दागिन्यांची ओळख पटल्याने पोलिसांनी तत्काळ सराफ दुकानात धाव घेत दागिनेचोराला अटक केली. त्याच्याकडून १५ लाख रुपयांचे दागिने जप्त केले आहेत.

उल्हासनगर शहरातील कॅम्प नंबर पाच परिसरात सिंधी समाजाची आस्था असलेले आणि हेरिटेज धार्मिक स्थळाचा दर्जा प्राप्त असलेले चालिया मंदिरातील झुलेलाल दैवताच्या मूर्तीवरील दागिन्यांची काही दिवसांपूर्वी चोरी झाली होती. या प्रकरणी मंदिरातील सीसीटीव्ही आणि सुरक्षेबाबतही प्रश्नचिन्ह उपस्थित करण्यात आले होते. त्यामुळे सिंधी समाजात नाराजीचे वातावरण होते. तसेच, पोलिसांवरही या घटनेचा तपास लावत चोरांना अटक करण्याचा दबाव होता. अखेर पोलिसांचा तपास सुरू असतानाच, कॅम्प नंबर एक येथील एका सराफाकडे दागिने चोरणारा चोर सोने घेऊन आला होता. मात्र सराफाने दागिने पाहताच हे दागिने चालिया मंदिरातील झुलेलाल देवताच्या मूर्तीवरील असल्याचा संशय बळावला.

सोनाराने तत्काळ याबाबत माजी नगरसेवक प्रकाश माखिजा यांना माहिती दिली. तसेच, माखिजा यांनीही मंदिराचे विश्वस्त आणि पोलिसांना माहिती देत सराफाकडे बोलावून घेतले. मंदिराचे विश्वस्त यांनी दागिने ओळखताच, पोलिसांनी मंदिरातील दागिने चोरीप्रकरणी आरोपी अनिल करेरा याला अटक केली.