४ बोगस डॉक्टरांवर गुन्हा दाखल

म. टा. वृत्तसेवा, उल्हासनगर

शहरातील बोगस डॉक्टरांविरोधात महापालिकेने कारवाई सुरू केली असून विठ्ठलवाडी पोलिस ठाण्यात ४ बोगस डॉक्टरांविर गुन्हे दाखल करण्यात आले आहेत.

उल्हासनगर शहरातील सिमरन शर्मा या १६ वर्षीय विद्यार्थिनीला पंजाबी कॉलनी, उल्हासनगर ३ येथील एका खासगी डॉक्टरांकडे उपचार करण्यासाठी नेण्यात आले होते. उपचारानंतर सिमरनचा मृत्यू झाला. हा डॉक्टर बोगस असल्याचा आरोप करण्यात आला होता. या प्रकरणानंतर त्या डॉक्टरासह शहरातील सर्वच बोगस डॉक्टरांविरोधात कारवाई करावी, अशी मागणी महापालिकेकडे करण्यात आली होती. या संदर्भात महापालिका आयुक्त राजेंद्र निंबाळकर यांनी वैद्यकीय अधिकारी डॉ. राजा रिजवानी यांना शहरातील बोगस डॉक्टरांविरोधात कारवाई करण्याचे आदेश दिले. याप्रकरणी पालिकेने बोगस डॉक्टरांची शोधमोहीम सुरू करून विठ्ठलवाडी पोलिस ठाण्यात डॉ. राजा रिजवानी यांनी फिर्याद दिल्यानंतर सुरेश रामरखीयानी, एन. एस. जाधव, अनिलकुमार निकाळजे, सुनील पाटील या ४ बोगस डॉक्टरांविरुद्ध फसवणुकीचा गुन्हा दाखल करण्यात आला आहे. या डॉक्टरांकडे वैद्यकीय व्यवसाय करण्याची आवश्यक शैक्षणिक पात्रता नसताना व महाराष्ट्र मेडिकल कौन्सिलची मान्यता नसताना क्लिनिक चालवण्यात येत होते. या संदर्भात अधिक तपास सहाय्यक पोलिस निरीक्षक विजय अहिरे हे करीत आहेत.