म. टा. वृत्तसेवा, ठाणे
आर्थिक फसवणुकीच्या उद्देशाने व्यावसायिकाच्या धनादेशाची चोरी करत त्यावर व्यावसायिकाची खोटी सही केली आणि हे धनादेश वैयक्तिक कर्जासाठी, तसेच इतर वेगवेगळ्या लोकांना दिल्याप्रकरणी एकाविरुद्ध नौपाडा पोलिस ठाण्यात गुन्हा दाखल करण्यात आला आहे.
हेमल शहा (ग्रीनवूड सोसायटी, कासारवडवली) असे या आरोपीचे नाव आहे. ठाण्यातील मखमली तलावाजवळ आनंद गायकवाड (५१ रा. टेकडी बंगला) यांचे दुकान असून दुकानाचे आर्थिक व्यवहारासंबंधितचे काम पाहण्याची जबाबदारी हेमल याच्यावर सोपवली होती. कामाचा मोबादलाही देण्यात येत होता. हेमल हा बँकेतून कर्ज मंजूर करण्याचे काम करत होता. या कामाचे तो लोकांकडून कमिशनही घेतो. हेमलने गायकवाड यांना फोन करून घोडबंदर रोड परिसरात गायकवाड यांना भेटण्यासाठी बोलावले आणि पंजाबचा एक व्यक्ती पैशाची मागणी करत असून मानसिक त्रास देत असल्याचे हेमल म्हणाला. हा व्यक्ती ठाण्यातच आलेला असल्याचेही त्याने सांगितल्यानंतर गायकवाड यांनी त्या व्यक्तीची भेट घेतली असता धक्कादायक बाब पुढे आली. या व्यक्तीची प्रॉडक्शनची कंपनी असून फिल्म व्यवसायासाठी कर्जाची आवश्यकता होती. दोन कोटी कर्ज मंजूर करतो असे सांगून हेमलने कमिशन घेतल्याचे हा व्यक्ती गायकवाड यांना म्हणाला. हेमलने दिलेले धनादेशही या व्यक्तीने गायकवाड यांना दाखवले असता हे धनादेश गायकवाड यांच्या बचतखात्याचे होते. या धनादेशावर गायकवाड यांची खोटी सहीही करण्यात आली होती.
गायकवाड यांनी बँकेत चौकशी केल्यानंतर वेगवेगळ्या पार्ट्यांना धनादेश देण्यात आले होते. मात्र त्यांच्या खात्यात पैसे नसल्याने धनादेश वटले नाहीत. त्यामुळे गायकवाड यांची कोणतीही आर्थिक फसवणूक झाली नसली तरी आर्थिक फसवणुकीचा प्रयत्न केल्याप्रकरणी हेमल याच्याविरुद्ध शनिवारी गुन्हा दाखल करण्यात आला.