​डोंबिवलीत ‘ओएलएक्स’वर गाडी हेरून चोरी

म. टा. वृत्तसेवा, डोंबिवली

ओएलएक्सवर गाडी विकण्याची जा​हिरात देणाऱ्या गाडीमालकांना हेरून ‘तुमची गाडी भाडेतत्त्वावर लावून देण्याचे आमिष दाखवत फसवणूक करणाऱ्या मयूर तांबोळी या ठकसेनाला पोलिसांनी कल्याण-शिळ मार्गावरील निळजेगाव येथून अटक केली. त्याच्याकडून पोलिसांनी चार गाड्या जप्त केल्या आहेत.

डोंबिवली पूर्वेकडील एमआयडीसी परिसरात राहणाऱ्या एका गाडी मालकाने मयूरविरोधात १७ जून रोजी तक्रार केली होती. ओएलएक्सवर गाडी पाहिल्यानंतर फिल्मसिटीमध्ये भाडे तत्त्वावर लावून देतो, त्या मोबदल्यात महिना ४० हजार रुपये देण्याचे आमिष मयूरने दाखविले. त्यासाठी करार आणि जीपीएस बसविण्यासाठी पाच हजार रुपये उकळले. मात्र बराच कलावधी लोटल्यानंतर काहीच हालचाल न झाल्याने या गाडीमालकाने मयूर तांबोळीविरोधात मानपाडा पोलिस ठाण्यात तक्रार दाखल केली होती.

नवी मुंबई येथील बेलापूर येथे राहणारे अरुण गायकवाड यांच्याशीही मयूरने ओएलएक्सच्या माध्यमातून ओळख केली. यावेळी त्याने मोठ्या कंपनीत गाडी भाड्याने लावून देतो असे सांगितले. त्यानुसार त्यांची गाडी एप्रिलमध्ये भाड्याने लावली होती. त्यानंतर त्यांनी तांबोळीला गाडी व ५ हजार रुपये दिले. मात्र महिनाभराचा कालावधी उलटूनही भाडे किंवा गाडी परत न केल्याने गायकवाड यांना संशय आला. फसवणूक झाल्याची खात्री पटल्यानंतर त्यांनी मानपाडा पोलिस ठाण्यात धाव घेऊन तांबोळीविरोधात तक्रार दाखल केली. या तक्रारीनुसार पोलिसांनी गुन्हा दाखल करत मयूरला बेड्या ठोकत त्याच्याकडून चोरलेल्या

चार गाड्या पोलिसांनी जप्त केल्या आहेत.

‘ओएलएक्स’या वेबसाइटवर अनेक गाडीमालक आपल्या कार विकण्यासाठी माहिती टाकतात. ठकसेन मयूर अशाच गाडीमालकांची दिशाभूल करत आहे. आतापर्यंत त्याच्याकडून गाड्या जप्त करण्यात आल्या असून आणखी काही गाडीमालकांची त्याने फसवणूक केली का, याचा शोध पोलिस शोध घेत आहेत.